Një “shembull i përsosur i integrimit”- kështu e përshkruajnë mediat italiane të riun shqiptar, Klajdi Bitri, 23-vjeçari shqiptar i vrarë pasditen e së dielës në Sirolo.
I riu punonte në port dhe ishte i integruar mirë në realitetin e Ankonës, qytetit ku jetonte. Ai u vra në përpjekje për të mbrojtur një mik italian, i cili ishte sulmuar nga i akuzuari dhe më pas arrestuar për krimin.
“Unë dua drejtësi. E pashë vëllain të vdiste para meje, të vrarë me indiferencë totale, pa e kuptuar as pse. Pa pasur kohë për të kuptuar se ai po vdiste. E pashë të zbehej gjithnjë e më shumë, krejt papritur, dhe nuk më përgjigjej më sepse kishte vdekur. I vrarë”,- thotë vëllai i shqiptarit.
I riu kërkon të kthejë trupin e vëllait në Shqipëri, ku jetojnë prindërit e tyre: “Nuk do të mund të vijnë në Itali. Ndihem i detyruar të zgjidh të gjitha dokumentet e nevojshme dhe ta sjell atë në shtëpi”. Dhe përsëri, ai kujton: “Ai nuk ishte vetëm vëllai im, ai ishte edhe babai im. Ai ka punuar gjithmonë dhe vetëm për të më çuar në Itali, për të gjetur një jetë më dinjitoze”.
Këshilltarja rajonale e Lidhjes Lindita Elezi, një shtetase italiane me origjinë shqiptare, e cilësoi 23-vjeçarin e vrarë si “shembull perfekt integrimi” dhe aktualisht po mbledh dëshmitë e dhimbjes dhe ngushëllimet nga komuniteti shqiptar.
“Ai dha gjithçka, dha jetën, për mua është edhe një dëshmi e natyrës së popullit tonë, të guximshëm dhe gjithmonë të gatshëm për të mbrojtur ata që kanë nevojë”, shtoi ai. Ata që e njihnin viktimën flasin për të si një djalë i lidhur me familjen, i cili i telefononte çdo ditë nënës së tij.
Elezi është vënë në dispozicion të familjes së Klajdit por edhe qeverisë shqiptare, “për çdo gjë të nevojshme”.
Ndërkohë i akuzuari për krimin ndodhet në burg. Njëzet e shtatë vjeç, me origjinë algjeriane, akuzohet për vrasje me dashje të rëndë.
