Dalldia e rrjeteve sociale në radhët e zyrtarëve publikë për t’i dhënë vizibilitet punës së tyre shpërfaqet herë pas here në forma qesharake. Dy vite më parë një perlë na erdhi nga Greqia, ku ambasadorja jonë në Athinë ishte takuar me konsullin e Shqipërisë në Janinë dhe në njoftimin e publikuar thuhej se kishin diskutuar për forcimin e bashkëpunimit, a thua se takoheshin zyrtarët e Koresë së Veriut me Korenë e Jugut, jo sikur ishin breneda të njëjtit shtet dhe aq më tepër brenda të njëjtit dikaster, Ministrisë së Jashtme. Shih foton më poshtë, e cila pas gafës së rëndë u fshi nga faqja e ambasadës sonë.
Një perlë tjetër vjen kësaj radhe nga Saranda. Kryetari i Bashkisë, Oltion Çaçi tregon në faqen e tij në Facebook se është takuar me prefektin, nënprefektin, kryetarin e këshillit bashkiak, sekretaren dhe nja dy punonjës të tjerë. Nga çfarë shkruhet në njoftim, thelbi është forcimi i bashkëpunimit dhe koordinimit me njëri-tjetrin, a thua se po takohen me përfaqësues të ndonjë shteti tjetër, a thua se më parë armiqësia ishte ulur këmbëkryq mes Oltit, Flamurit, Kiços dhe Asafit e se duhej një takim i tillë për t’u dakordësuar që do të përmbushnin ato që në fakt i kanë thjesht detyre të tyre funksionale.
Merreni me mend vetë tani se çfarë estrade që është kjo; kryetari i bashkisë do forcojë bashkëpunimin me vartësit që i emëron dhe shkarkon vetë, prefekti do forcojë bashkëpunimin me nënprefektin, shefat e sektorit do forcojnë bashkëpunimin me specialistët… pastaj të gjithë do koordinohen me njëri-tjetrin për të çuar punët përpara. Çfarë ngjarje e madhe! Më në fund shkrirje akujsh në Sarandë mes zyrtarëve publikë. Tani s’na mbetet gjë tjetër veçse të presim frytet e këtij momenti historik e të shumëpritur. Ata më në fund ranë dakord të bashkëpunojnë. Urime! (Foto më poshtë)
