Çatitë e shtëpive karakteristike të Gjirokastrës, sa të veçanta janë, aq janë edhe të vështira për t’u riparuar dhe mirëmbajtur. Një prej ustallarëve të këtyre çative, është Pano Vlashi.
Teksa e shikon në majë të këtyre çative, askush nuk do ta besonte sa vjeç është nëse ai vetë nuk do ta pohojë.
“Unë jam 27 gusht i 34-s. I lash 89 hyra në 90. Unë nuk kam shumë, që nga 50-ta.”
Mbi 70 vite në këtë zanat, Pano nuk arrin të numërojë çatitë që i ka bërë me dorën e tij jo vetëm në Gjirokastër, por në të gjithë jugun. Ndërsa puna ende nuk i jep asnjë vështirësi.
“E kam filluar që nga fshatrat e Tepelenës dhe kam dalë në Livadhja, në Kulluricë, në Vrinë, në Ksamil, në Pepel, në Labovë të kryqit, në Labovë të Zhapës, Zagorie. Janë hektarë që kam kaluar në dorë. E vështirë? Mua s’më duket gjë fare.”
Për të, brezi i ri nuk e do këtë zanat dhe për të konkretizuar këtë përfundim ka një histori me nipin e tij.
“Me thënë të drejtën nuk e kanë qejf zanatin. Unë mora djalin e vajzës para 5 viteve në Qafën e Pazarit. Vijnë godinat 1+1 atje. Koha ishte dimër, pllakat qenë qepur në akull. I zoti më tha dua të ma bësh se do bëjmë lokal. I thash do vish ti. 10 me 2 do ikim, se ishte akull fare. Hipi në shkallën e parë, më tha nga të zbres. I thashë të parën e kam bërë unë shkallën. Të dytën, të tretën, do vish te e katërta. Litarin i thash e kam unë, do të lidh një metër nga fundi. Zbrita unë më tha, nuk mundem. Më duket sikur do bie nga Çerçizi.”
Pano Vlashi – Usta 89 vjeç
Ndërsa bashkëmoshatarët e tij janë të rrallë që dalin nga banesa për ndonjë shëtitje të shkurtër, Pano Vlashi, nuk e ka ende në plan të tërhiqet nga puna majë çative karakteristike të Gjirokastrës./A2Cnn
