Ministri i Jashtëm, Igli Hasani ka dhënë lajmin e mirë se pas shumë përpjekjesh kanë arritur të shpëtojnë në Gaza, një nënë shqiptare së bashku me 4 fëmijët e saj të mitur.
Përmes një postimi në rrjetet sociale ministri Hasani ka bërë me dije se shtetasit shqiptarë tashmë ndodhen të sigurt në Egjipt, teksa janë duke vazhduar me procedurat për kthimin e tyre sa më të shpejtë në Shqipëri. Ai thekson se qeveria shqiptare është duke vazhduar punën për të bërë të mundur kthimin e sigurt të shtetasve të tjerë shqiptarë të cilët ndodhen në Gaza.
“Pas tre javësh përpjekjesh e vështirësish, më në fund shtetasit e parë shqiptarë, një nënë dhe 4 fëmijët e saj të mitur, sapo lanë territorin e Gazës.
Ata ndodhen tashmë të sigurt në Egjipt, ndërsa vijojmë proçedurat për kthimin e tyre sa më të shpejtë në Shqipëri.
Mirënjohje për autoritetet e Izraelit dhe Egjiptit për bashkëpunimin, IOM – UN migration dhe ICRC për mbështetjen si dhe kolegëve të ambasadave shqiptare në dhe për punën e mirë në këtë situatë e operacion kompleks.
Po punojmë ngushtë me autoritetet për kthimin e shpejtë e të sigurt të shtetasve të tjerë që ndodhen në Gaza”, shkruan ministri.
