Mesfushori i Flamurtarit, Behar Ramadani, i cilëson lojtarët Bregu, Abazaj dhe Lamçja si më të shpejtët e kampionatit dhe thotë se është shumë e vështirë të vraposh pas tyre. Në deklaratën e dhënë pas ndeshjes për “Supersport”, ai u shpreh se pika e marrë në Vlorë është shumë e vlefshme pasi kampionati është shumë i vështirë.
Për lojën më të mirë në pjesën e parë
“Ne pjesën e parë e vërtetë që dhamë më tepër. E morëm jo vetëm mesfushën, por e rrezikuam shumë Flamurtarin dhe nuk u ndjemë në rrezik në asnjë moment. Ekipi qarkulloi shumë topin dhe dubluam njeri-tjetrin, bëmë presion te kundërshtari. Në pjesën e dytë lëshuam pak nga lodhja, por morëm një pikë shumë të vlefshme. Këtu në Vlorë ka presion, por të lejojnë të luash futboll.”
Për objektivin krahasuar me vitin e kaluar
“Synimi jonë është që të vazhdojmë ecurinë e vjetshme, të japim më të mirën tonë dhe të shohim çdo arrijmë. Na ikën disa lojtarë me peshë nga viti i kaluar, sidomos në luftën në ajër, ishin lojtarët bazë dhe tani kemi pak vështirësi me lojën në ajër, por erdhën ca të tjerë. Kemi më shumë eksperiencë se vjet kur nuk na njihte njeri.
Të gjithë minimumi kanë bërë nga 20-25 ndeshje ndaj tani ndikon pak eksperienca. Besoj që ky është kampionat shumë i çuditshëm dhe kështu do vazhdojë. S’ka më fushë kundërshtare, fusha jote. Do jetë kampionat shumë i vështirë, e kam thënë gjithnjë.”
Viti i kaluar, merita edhe të lojtarëve, jo vetëm të Milinkoviç
“E vërtetë që e kemi nisur shumica e lojtarëve që ishim. Mbi 60% ishim ne që e sollëm Luftëtarin në Superiore. Kemi afruar dhe disa lojtarë të rinj shumë të mirë, por kurrsesi s’mund ta hedhim poshtë punën e Milinkoviçit. Ai ishte shumë profesionist, dinte ç’ti merrte ekipit. Por edhe tani, po mos ketë lojtarë, jo Milinkoviç të jetë po kushdo vështirë të kesh rezultate. Ai me punën e tij dhe aftësitë tona bëri atë që bëri. Brumi është prapë sivjet dhe mendoj se do ecim prapë.”
Vështirësia për të vrapuar pas Bregut, Abazajt dhe Lamçjas
“Është e vështirë. Jo vetëm unë dhe Beqiri, por ka edhe lojtarë të tjerë që mbajnë peshë. Ai është me më shumë eksperiencë. Sa i përket vrapit pas Bregut, Abazajt dhe Lamçjas, është e vështirë jo vetëm se janë mirë në fazën ofensive, por se janë shumë të shpejtë, më të shpejtët e kampionatit. Ata na ndihmojnë edhe në mbrojtje, kam parë sot 4-5 momente që Bregu ka ardhur deri në fundore, edhe Abazaj në krahun tjetër, Lamçja na ndihmoi shumë në mesfushë.”
