Në Gjirokastër është duke përfunduar rikualifikimi urban i një hapësire në lagjen “18 Shtatori”, në zonën e njohur ndryshe edhe si sheshi përballë farmacive qëndrore. Çfarë të bën përshtypje në një pjesë të trotuarit është një kabinë e madhe me kabuj e tela të fibrave të internetit, telefonisë fikse apo ndoshta dhe të energjisë elekrike. Por me sa duket nuk është parë e arsyeshme që kjo kabinë të lëvizet.
Çuditërisht ajo është spostuar pakëz nga pozicioni që ka pasur më parë, por nuk është zhvendosur. Duket e shëmtuar estetikisht dhe është gjithashtu një pengesë në përdorimin e trotuarit nga kalimtarët. Sido që të jetë projekti që po zbatohet prej kompanisë që kryen punimet, nuk kërkon ndonjë sforcim të jashtëzakonshëm zhvendosja e kësaj kabine diku gjetkë.
Në emër të interesit publik, enti shtetëror që po kryen punimet, Bashkia Gjirokastër në këtë rast, ka fuqinë të ndërhyjë duke e detyruar kompaninë e cila e ka në pronësi këtë kabinë të kryejë zhvendosjen. Po që nevoja edhe për shpronësim bashkia mund ta kryejë. Interesi publik prevalon gjithmonë!
Ky rast të sjell ndërmend dikur Edi Ramën me sopatë në dorë kur ishte kryetar bashkie i Tiranës. Asokohe Filiali i Telekomit refuzonte të hiqte shtyllat nga rruga që po asfaltohej ndonëse ato ishin pengesë për lëvizjen dhe estetikisht të shëmtuara. Kryebashkiaku përveshi mëngët dhe mori sopatën në dorë duke i prerë vetë shtyllat. Tani nuk është se pretendojmë të bëjë të njëjtën gjë edhe Flamur Golemi me sopatë e me çekiç, por së paku të ndërhyjë te kompania që kabina e shëmtuar në trotuarin e ri të “18 Shtatorit” të hiqet prej aty. Jo për gjë po kështu lëvizin dhe më lirshëm kalimtarët. Shihni fotot më poshtë. ©Argjiroja.net
