Historia e tij është e ngjashme me atë të shumë shqiptarëve të tjerë, që në fillim të viteve ’90 nuk morën rrugët e emigrimit, por nisën sipërmarrjet e para private në ekonominë e re të tregut. Fjala është për Spiro Ligun, biznesmenin e njohur në Gjirokastër dhe në krejt rajonin e jugut.
Në një rrëfim për RTSH ai tregon rrugëtimin e tij të vështirë për të pasur biznesin e vet në moshë fare të re. Ligu tregon se gjithçka nisi në vitin 1993 kur ai ishte vetëm 13 vjeç dhe i kërkoi familjes së tij të kishte një tezgë për të shitur në treg. Me pak kursime që i dha familja, arriti të sajonte tezgën e të blinte produktet e para për tregti. Bëhet fjalë për çamçakëza, çokollata e cigare.
Gjithçka shkoi mirë kujton Spiro prej ditës së parë kur doli me tezgën e tij ndërsa me kalimin e kohës nisi të shtonte produktet që shiste. Moment kulmues ishte edhe blerja e një kioske pas ndihmës që mori prej nunit të tij në Qipro. Më pas kioska solli dyqanin e parë, i cili u pasua nga një dyqan tjetër.
“Brilant – Jewellery & Watches dhe “Brilant – Bags + Accessories” janë prej vitesh dy marka të njohura në Gjirokastër e jo vetëm, të krijuara mjeshtërisht prej Spiro Ligut. Produktet e luksit, bizhuteritë, parfumet, çantat dhe aksesorë të ndryshëm i gjen sot në këto dy dyqane me emër. Në rrëfimin e tij të gjatë sipërmarrësi 44-vjeçar tregon gjithashtu edhe investimet në apartamente me qira ditore vitet e fundit kur turizmi në Gjirokastër ka njohur një ngritje të madhe.
I pyetur nëse ka qenë i tunduar për t’u larguar nga Gjirokastra si shumë të tjerë më parë apo vitet e fundit, Spiro Ligu tregon se gjithmonë ka besuar në moton, që është më mirë të jesh i pari në fshat sesa i fundit i në qytet. Sidoqoftë ai thekson se për aq kohë sa ka pasur të ardhura përmes biznesit të tij në Gjirokastër nuk e ka parë të udhës të largohet.
Spiro Ligu ia dedikon suksesin në biznes familjes së tij, nunit në Qipro për ndihmën në një moment deçiziv dhe bashkëshortes, Elva Ligu. Ai nuk harron të falënderojë në mënyrë të veçantë të gjithë qytetarët e Gjirokastrës dhe klientët e dyqaneve të tij përgjatë këtyre 30 viteve që merret me biznes. Në videon më poshtë ndiqni rrëfimin e plotë të Spiro Ligut. ©Argjiroja.net
