Përçahet stafi uruguaian i Luftëtarit. Prej ditësh trajneri Daniel Fernandez dhe zëvendësi i tij, Luis Kurbelo (ky i fundit del gjithnjë për mediat para dhe pas ndeshjes), kanë një raport të ftohtë mes tyre, që ka ndikuar jo pak edhe në situatën e skuadrës.
“Panorama Sport” zbulon se uruguaianët nuk kanë një marrëdhënie normale dhe qejfmbetje mes tyre për procesin stërvitor, por mbi të gjitha për zgjedhjet në formacion. Kjo ka zhgënjyer së tepërmi drejtuesit, të cilët janë çuditur me sjelljen e uruguaianëve dhe menjëherë kanë urdhëruar që të sheshohen marrëdhëniet, në të kundërt masat do të jenë drastike. Deri pak ditë më parë rezultatet pozitive “fshehnin” gjithçka, por pas ndeshjes me Kamzën ka arritur kulmi. Drejtuesit kanë vendosur ultimatum për stafin teknik dhe vetë futbollistët. Këtë e ka konfirmuar dje në një bisedë për “Panorama Sport” vetë presidenti Tavo, i cili nuk e ka përtypur humbjen e fundit ndaj Kamzës.
REAGIMI “Pas masave të marra dhe atyre që priten të pasojnë, ne si presidencë kemi vendosur si objektiv për tri ndeshjet e radhës marrjen e të paktën 5 pikëve. Ky është ultimatum për lojtarët dhe stafin teknik. E dimë që do të luajmë ndaj Partizanit, Kukësit dhe Skënderbeut, por jemi të bindur se i kemi mundësitë për të marrë pikë ndaj kujtdo skuadër. Në rast se synimet nuk arrihen, atëherë duke filluar nga stafi teknik dhe deri te futbollistët më pak të aktivizuar, do të jenë pa dyshim përgjegjës për këtë situatë”, – deklaroi dje Tavo, duke dhënë sinjale të qarta se nuk mund të tolerojë më gafa si ato ndaj Kamzës në Gjirokastër.
Luftëtari e kishte ndeshjen në dorë, kur një gabim fatal i portierit Festim Miraka i dhuroi penallti kundërshtarit, që u kthye në gol nga Raçiç. Klubi kërkonte vetëm fitore ndaj Kamzës, duke parë edhe kalendarin jo të favorshëm që ka në vijim. Për mënyrën se si rrodhi loja, ndoshta edhe një pikë nuk do të ishte keq, por Luftëtari la tri të tilla në shtëpi.
Pesë pikë në po kaq ndeshje nuk kanë lënë të kënaqur drejtuesit bluzi, të cilët këtë sezon kërkojnë që skuadra të pretendojë vendet e nderit, duke qenë pjesë e Ligës së Europës. Tashmë bluzinjtë do të sfidojnë Partizanin të hënën në kryeqytet.
