Një gjumë i mirë dhe i rregullt është shumë i rëndësishëm për të siguruar një shëndet të mirë mendor. Në fund të fundit, ankthi dhe depresioni shpesh përkeqësohen nga gjumi i pamjaftueshëm.
Prandaj ekspertët sugjerojnë disa teknika të thjeshta, por efektive që kontribuojnë për një gjumë sa më të rehatshëm.
Vendosni një “stop” teknologjisë
Dhoma e gjumit është një hapësirë që çdo person e lidh me fjetjen. Prandaj, këshillohet që të hiqni çdo gjë që mund t’ju shqetësojë gjumin, si televizori, kompjuteri ose celulari pranë shtratit. Kështu do të jeni në gjendje të relaksoheni dhe të flini më lehtë. Përveç kësaj, drita blu nga këto pajisje elektronike ndikon në prodhimin e melatoninës, hormonit që rregullon gjumin, duke shkaktuar çrregullime të ngjashme. Shmangni përdorimin e pajisjeve të tilla dy orë para, për të zvogëluar efektet e tyre.
Trajtoni simptomat fizike
Dhimbja e kokës, gripi apo problemet e tjera shëndetësore mund të ndikojnë në gjumin gjatë natës. Konsultohuni me mjekun ose farmacistin tuaj për problemet që keni në mënyrë që të merrni një mjekim për atë që ju shqetëson.
Rregulloni dritën, tingujt dhe temperaturën e dhomës
Drita ose tingujt brenda dhe jashtë dhomës ka të ngjarë t’ju bëjnë të vështirë të bini në gjumë ose të zgjoheni papritur. Për gjërat që nuk mund t’i shmangni, provoni maska për sytë ose tapa veshësh. Temperatura e dhomës është gjithashtu e rëndësishme, kështu që nëse flini me dikë që ka një preferencë të ndryshme për temperaturën e dhomës, provoni mbulesa të veçanta ose zgjidhje të tjera që do ta bëjnë gjumin tuaj më të këndshëm.
Provoni teknikat e relaksimit
Një person që mendon se si të flejë ose është nën presion për ta arritur atë, definitivisht nuk po fle mjaftueshëm. Ndaj gjeni mënyra për të relaksuar mendjen dhe trupin tuaj para se të shkoni në shtrat.
Zgjidhni ushqime që nxisin gjumin
Orizi, tërshëra dhe produktet e qumështit na furnizojnë me aminoacidin triptofan, i cili mendohet se rrit dëshirën për të fjetur. Në vend të kësaj, është një ide e mirë të shmangni kafeinën, ushqimet e pasura me sheqer ose vaktet gjatë orëve të vona të darkës.
Shmangni alkoolin
Alkooli ndikon negativisht në cilësinë e gjumit dhe mund t’ju mbajë zgjuar për një kohë të gjatë. Mund të shkaktojë gjithashtu urinim të shpeshtë ose dehidrim, duke bërë që të zgjoheni shpesh gjatë natës.
Ushtroni rregullisht
Ushtrimet e rregullta ju ndihmojnë të flini më mirë, pasi redukton ankthin dhe lehtëson stresin. Rekomandohet që aktivitetin fizik ta bëni herët në mëngjes, sepse rrit prodhimin e adrenalinës në trup, gjë që nëse ndodh në orët e vona të pasdites mund të mos ju lejojë të bini lehtë në gjumë.
Mos dremitni gjatë ditës
Zakonisht disa njerëz mund të ndjejnë nevojën për të bërë një sy gjumë gjatë ditës. Megjithatë, nëse nuk jeni tepër të përgjumur, është mirë ta shmangni atë. Provoni të bëni një shëtitje të shkurtër, të merrni ajër të pastër ose të bëni diçka tjetër që do t’ju zgjojë.
Nëse nuk jeni të lodhur, mos qëndroni në shtrat
Nëse keni probleme për të fjetur, mos qëndroni në shtrat duke u shqetësuar se kur do të bini në gjumë. Ngrihuni dhe ecni përreth, pini një lëng frutash, lexoni një libër dhe kthehuni në shtrat kur ndiheni më të përgjumur.
