Biznesmeni i njohur nga Gjirokastra, Robert Shehu, ka ndërruar jetë. Lajmin e njofton Roland Bejko në faqen e tij në Facebook bashkë me mesazh ngushëllimi teksa evidenton edhe kontributin e tij të madh.
Shënimi i plotë i Bejkos
Me trishtim e dhimbje të thellë u njoha me lajmin e hidhur të ndarjes nga jeta të z. Robert Shehu nga Gjirokastra..
Berti ishte pinjoll i një familje qytetare, me rreth të gjerë shoqëror e miqësor, bashkëbisedues inteligjent, pasionant, dhe i qartë në çdo situatë, por mbi të gjitha punëtor i palodhur.
Biznesi familjar i Bertit, Bar-Shehu, u kthye për ne në një institucion takimesh me miqtë, me të njohur e të panjohur, për evente familjare e politike, por mbi të gjitha me humorin dhe bazagazjen e mikëpritësit, Berti Shehu.
Disa ditë më parë komunikova me Bertin dhe zonjën e tij të nderuar ku shkëmbyem batuta dhe i çova një video të shkurtër në kujtim të vëllait të tij të ndjerë, Fredi Shehu, vrarë pabesisht në 1998.
Berti po ikën dëshpërimisht parakohe nga kjo jetë si shumë të tjerë kohët e fundit duke lënë pas dhimbjen e madhe te bashkëshortja e tij Afërdita, fëmijët, te nipërit e mbesat e tij të dashur. Berti iku, por la mbrapa emrin e mirë të një qytetari të nderuar.
Ne të tjerëve, miqve të tij veç kujtimeve të bukura, na la dhe mundësinë që ta kujtojmë gjithmonë duke vazhduar ta pimë kafen e punës a të politikës aty, te SHEHU, në qendër të lagjes 18 Shtatori në Gjirokastër.
Me këtë rast, i shpreh ngushëllimet e mia familjes Shehu, bashkëshortes Afërdita, fëmijve, vëllezërve, të afërmve e miqve të shumtë për humbjen e parakohshme të njeriut të tyre të dashur!
U prehsh në paqe Bert!
