Eduart Danaj nuk ka shprehur pendesë para hetuesve për vrasjen e ish-bashkëshortes në mes të Athinës. Ai ka thënë se nuk pendohet për aktin e rëndë sepse sipas tij ish-bashkëshortja e tradhtonte. Fjalët e tij të para për policinë ishin: Vrava gruan time dhe nuk pendohem. 50-vjeçari u arrestua pasditen e sotme nën efektin e alkoolit në një pallat në Fili. Ai punonte në godinën ku u gjet, ndërsa punonte edhe në një tavernë si bukëpjekës në Metamorfosi.
“Ajo po hante paratë e mia. Ajo kishte një lidhje jashtëmartesore për shumë vite me burra të ndryshëm. Nuk mund ta shihja të dashurin e saj duke drejtuar makinën dhe fotot e tij në Facebook,” ka thënë autori i vrasjes, sipas Star.gr.
Sipas asaj që ka dalë në dritë, vrasësi 50-vjeçar pasi ka vrarë gruan e tij, ka shkuar në një hotel dhe ka paguar për të qëndruar natën. Hetuesit e panë atë në kamera dhe e ndoqën gjatë gjithë rrugës ku mund ta dallonin. Autoritetet i dhanë sinjal të gjitha shërbimeve për ta kërkuar, por edhe në kufi që të mos largohej nga Greqia. Madje autori ka ecur me rroba të përgjakura. Kur e gjetën, ai ishte nën efektin e alkoolit. Ai pretendoi se kishte pirë vetëm dy birra, ndërsa në banesë u gjetën dy thasë me shishe birre. Në dëshminë e tij, asnjëherë nuk deklaroi se ishte penduar për veprimin e tij. “Do të të vras dhe pastaj do të vras veten. Do të bëhesh edhe ti si nëna jote”, dyshohet se i ka thënë vajzës së tij.
40-vjeçarja, Enkelejda Danaj u gjet e pajetë mëngjesin e kësaj të enjte në kryqëzimin e rrugëve Parnithos dhe Aristotelous, një nga pikat më qendrore të Menidit në Greqi. Ajo ishte goditur me thikë në bark nga ish-bashkëshorti i saj, Eduart Danaj 50-vjeç me origjinë nga Vlora. Raportohet se 40-vjeçarja e kishte denoncuar tre herë ish-bashkëshortin për dhunë në familje, por ky i fundit është lënë i lirë nga policia vendase. Sipas informacioneve të mediave greke, Enkelejda kishte përmendur në denoncimet e saj se 50-vjeçari, kishte nisur të konsumonte sasi të mëdha alkooli dhe të bëhej i dhunshëm, ku si pasojë e ka dhunuar dhe kërcënuar disa herë. Hera e fundit që 40-vjeçarja e kishte denoncuar sërish për dhunë në familje (kanosje, lëndim fizik dhe fyerje) ka qenë më 7 maj 2024. Më pas burri është arrestuar dhe dërguar në prokurori, ndërsa do të dilte para gjyqit më 17 maj.
