Gazetari grek Spiros Sideris tha se Partia Popullore Europiane nuk ka pranuar ta regjistrojë Fredi Belerin si anëtar.
Ai tregoi në një intervistë për Euronews Albania se ky është një informacion i publikuar nga një media shumë e vjetër në Greqi.
“Më duhet të theksoj se sipas disa mediave Partia Popullore Europiane nuk pranoi ta regjistronte Fredi Belerin si eurodeputet për shkak të së kaluarës së tij kriminal por nuk mund të komentoj më tej.
Është një informacion mediatik nga gazeta “Istia”, që anon nga e djathta, shumë e afërt dhe është një gazetë shumë e vjetër në Greqi, dhe e tregonte në faqet e para që PPE mohoi ta konfirmonte Belerin si anëtar për shkak të së kaluarës së tij kriminale”, tha ai.
Një ditë më parë Gjykata e Posaçme e Apelit dënoi me dy vjet burg Fredi Belerin, duke lënë në fuqi vendimin e shkallës së parë.
Kryebashkiaku i zgjedhur i Himarës, Fredi Beleri ndodhet në burg që prej 12 majit të 2023.
Ai fitoi mandatin e deputetit në Parlamentin Evropian si përfaqësues i partisë udhëheqëse në Greqi, Demokracia e Re, në zgjedhjet e qershorit.
Me vendimin e sotëm të Apelit, që është i formës së prerë ai do të qëndrojë në burg deri në tetor dhe nuk do të mund të shkojë në Strasburg në korrik për të bërë betimin si eurodeputet.
