Gjirokastra nderon nesër Ismail Kadarenë, libër për ngushëllimet në Pazar

Ndarja nga jeta e shkrimtarit Ismail Kadare do t’u japë mundësinë edhe qytetarëve të Gjirokastrës, qytetit të tij të lindjes, të nderojnë gjeniun e letrave shqipe. Kryebashkiaku Flamur Golemi ka thënë gjatë një interviste për Vizion Plus se ditën e nesërme do të ketë një kënd të veçantë pranë Pazarit, ku qytetarët mund të lënë ngushëllimet e tyre në një libër të veçantë, i cili do t’i dorëzohet më pas familjes Kadare. Po kështu do të veprohet edhe në shtëpinë e lindjes së shkrimtarit, e cila funksionon prej kohësh si një muze për qytetin. “Po the Kadare ke thënë edhe Gjirokastra, po the Gjirokastra ke thënë edhe Kadare”, deklaroi kryebashkiaku Golemi gjatë intervistës. Sipas tij qyteti ka qenë një burim i jashtëzakonshëm frymëzim për veprat e shkrimtarit tonë të shquar, por edhe ai vetë prej famës së tij ndërkombëtare e ka bërë të njohur Gjirokastrën nëpër botë. ©Argjiroja.net