Eurodeputeti Fredi Beleri në një intervistë të dhënë për mediat greke e ka përshkruar si një emocion të madh betimin e tij dhe mbështetjen që ka marrë nga kryeministri Kyriakos Mitsotakis si dhe mbështetësit e tij.
Beleri është shprehur se, të shtunën do të duhet të kthehet në qeli për të vuajtur pjesën e mbetur të dënimit, por thekson se pas kësaj do të rikthehet sërish në Himarë.
Për të ardhmen e tij dhe nëse shpreson të dalë nga burgu, ai tha se duhet të paraqitet në burg të shtunën.
“Kam bërë kërkesë për lirim nga burgu. Do të kthehem në Himarë, është shtëpia ime. Unë nuk do të largohem. Unë do të përballem me pjesën tjetër të dënimit tim sido që të jetë.Ne duhet të kemi të drejta civile. Të kemi të drejtën e vetëvendosjes”, ka deklaruar ai.
Për shtetin ligjor në Shqipëri ai theksoi se: “Shumë raste tregojnë se drejtësia dhe ndarja e pushteteve nuk funksionojnë. Shqipëria është një vend evropian gjeografikisht dhe dua të besoj edhe nga ana kulturore. Por lidershipi i saj nuk ka bërë asnjë përpjekje për t’iu afruar Bashkimit Evropian”.
Në fund, ai deklaroi se do të përpiqet ta bëjë mirë punën e tij si eurodeputet.
