Në Shqipëri është kremtuar Dita e Ashures, që është dita e dhjetë e muajit Muharrem, ndërkohë në vend janë organizuar disa ceremoni dhe aktivitete.
Ceremonia qendrore për Ditën e Ashures është mbajtur në selinë e Kryegjyshatës Botërore Bektashiane në Tiranë, me pjesëmarrjen e qytetarëve dhe personaliteteve të fushave të ndryshme.
Kryegjyshi botëror i bektashinjve, Haxhi Dede Edmond Brahimaj, mbajti një fjalë përshëndetëse gjatë ceremonisë, duke përcjellë mesazhet e tij për Ditën e Ashures.
Pas ceremonisë qendrore, u organizua shpërndarja e ashures, ëmbëlsira e veçantë që i kushtohet kësaj dite dhe që konsiderohet si simbol i bereqetit dhe unitetit.
Ndërkohë, me rastin e kësaj dite selia e Kryegjyshatës Botërore Bektashiane është vizituar nga zyrtarë, politikanë dhe personalitete nga fusha të ndryshme.
Pjesë e ceremonisë në Tiranë ishte edhe një program artistik me këngë dhe valle, ndërkohë ceremoni dhe aktivitete të ndryshme janë organizuar edhe në qytete të tjera të vendit.
Gjatë regjimit komunist festimet për Ditën e Ashures në Shqipëri ishin të ndaluara për besimtarët, por kjo ditë filloi përsëri të shënohet pas vitit 1990, duke u vazhduar si traditë çdo vit.
