Petro Gjikuria, kandidati i opozitës për Bashkinë e Himarës, ka nisur këtë të mërkurë zyrtarisht fushatën. Atje kanë shkuar Vangjel Dule i PBDNJ-së, Tedi Blushi i Partisë së Lirisë dhe Ivi Kaso si përfaqësues i Partisë Demokratike.
Fushata është zhvilluar ca greqisht dhe ca shqip, me ata që dinin gjuhën tonë kombëtare dhe u drejtoheshin simpatizantëve duke shpjeguar kandidaturën dhe ata që i flisnin greqisht minoritetit. Petro Gjikuria u shpreh i bindur se pas 4 Gushtit, ai do të jetë kryetari i ri i Himarës.
“Sot Himara ka eurodeputetin e saj dhe në 4 gusht do të ketë dhe kryetarin e bashkisë. Bashkia Himarë nuk ka më kohë për të humbur. Prej vitesh vendi ynë ka mbetur pas teksa bota përparon. Një vend me njerëz punëtorë që kanë shkëlqyer kudo. Sot nuk është e denjë as për qytetarët e vet. Për 12 vite patëm një kryetar bashkie partiak. Një kryetar që qëndroi shumë kohë për të ndryshuar shumë pak.
Fredi Beleri e pa veten pas burgut me akuza të fabrikuara. Qeveria ndryshon krerët e bashkisë dhe i kërcënon me burgim nëse nuk bëjnë atë që u thuhet. Këta janë marioneta pa asnjë mundësi për të zgjidhur problemet. Më kujtohet kur kandidoi Beleri për herë të parë në vitin 2015, ku isha dhe unë dhe votova. Më kujtohet kur në vitin 2019 nuk e lejuan. Mbaj mend se vjet sa u zemërova për arrestimin e tij dhe sa u lumturova kur u zgjodh kryetar bashkie”, është shprehur Petro Gjikuria.
Ai u përgjigj dhe akuzave se është ekstremist grek dhe pjesë e Federatës Panepiriote.
“Më cilësojnë si ekstremist se jam anëtar i Federatës Panepiriote. Së pari aty jam si përfaqësues i himariotëve dhe jam shumë krenar për të. Së dyti, Federata Panepoiriote ka një rol të rëndësishm dhe ka ofruar donacione në disa zona të Shqipërisë dhe Greqisë. Kemi ndihmuar shkollën publike të Gjirokastrës”, tha kandidati opozitar.
Himara ka shkuar në zgjedhje të parakohshme dhe Presidenti i Republikës ka dekretuar datën 4 Gush. Në garë janë Petro Gjikuria i mbështetur nga opozita dhe Vangjel Tavo, i mbështetur nga Partia Socialiste në pushtet. Data e zgjedhjeve u caktua rreth dy javë më parë.
Zgjedhjet e fundit në Himarë u mbajtën më 14 Maj dhe u fituan nga Fredi Beleri. Ky i fundit nuk mundi të betohej për shkak se u arrestua më 12 Maj, dy ditë para ditës së votimit, nën akuzën e shitblerjes së votave. Pavarësisht se ishte në qeli, ai fitoi por nuk e gëzoi dot mandatin që i njohu KQZ, sepse u dënua me vendim të formës së prerë me 2 vite burg.
