Një aksident tragjik i preu në mes ëndrrat dhe jetën 18-vjeçarit nga Durrësi. Mëngjesin e 22 gushtit, i riu, Arlis Troplini, teksa ishte duke qarkulluar me automjetin e tij tip “Volkswagen” në autostradën Tiranë-Durrës, humbi kontrollin mbi mjetin dhe si pasojë përfundoi në kanal.
Pavarësisht se u dërgua me shpejtësi në spital, bluzat e bardha nuk arritën të shpëtojnë 18-vjeçarin.
Arlis Troplini është djalë i familjes së madhe Troplini, e vendosur në qytetin e Durrësit, ku zotëron disa prej bizneseve më të fuqishme, nga nga baret, restorantet, tregtia e makinave dhe pularitë. Konkretisht, i riu është djali i sipërmarrësit Fatos Troplini.
Arlisi dallohej mes shokëve të shumtë qe kishte, për gatishmërinë për të ndihmuar këdo, pavarësisht moshës së vogël, dhe edukatën që i kishte dhënë familja e tij e madhe.
Lidhur me këtë ngjarje të rëndë ka reaguar edhe shkolla ku 18-vjeçari ndiqte studimet. Përmes një reagimi zyrtar shkolla private në Tiranë u ka përcjellë ngushëllime familjarëve, shokëve dhe miqve të shumtë të Arlisit, i cili me ikjen e tij la pas një dhimbje të madhe.
“Mesazh Ngushëllimi
Me pikëllim të thellë morëm lajmin për humbjen e parakohshme të jetës të studentit tonë Arlis Troplini. Ndarja nga jeta e Arlisit është një humbje e madhe për familjen e tij, shokët, miqtë dhe për të gjithë familjen e madhe të Universitetit Ëestern Balkans.
Arlisi la një dhimbje të madhe tek njerëzit e tij më të dashur. Shprehim ngushëllimet më të sinqerta për familjen dhe të afërmit e Arlisit.
Mendimet dhe lutjet tona janë me ju!”, thuhet në reagimin e shkollës.
