Eurodeputeti dhe ish-kryebashkiaku i zgjedhur i Himarës Fredi Beleri ka lënë sot qelinë e burgut, pas vuajtjes së dënimit 2 vjeçar për korrupsion në zgjedhje. Pasditen e sotme Beleri ka mbërritur në Himarë ku është pritur nga dhjetëra simpatizantë me brohoritma, flakadanë dhe muzikë.
Gjykata e Fierit ka vendosur sot që Beleri të lirohet me kusht, edhe pse kishte ende dhe 6 javë nga koha e dënimit për të vuajtur. Tre seancat e mëparshme për lirimin e Belerit kanë dështuar për shkak të mungesës së dokumentacionit të nevojshëm.
Fredi Beleri u zgjodh eurodeputet i kandiduar nga Demokracia e Re në zgjedhjet europiane të 9 qershorit. Pas dënimit nga Apeli me 2 vite burg për korrupsion zgjedhor, Komisioni Qendror i Zgjedhjeve i hoqi Belerit mandatin e të zgjedhurit si kryetar bashkie në Himarë.
