Trajneri Hysen Dedja do të debutojë në stolin e Lushnjës në një ndeshje shumë të vështirë, siç është transferta me Luftëtarin. Në fakt, gjendja e skuadrës myzeqare ka qenë e mirë pas fitores me Teutën, e para në këtë kampionat, por tani janë mungesat që shqetësojnë.
Lushnja do të ketë disa mungesa për ndeshjen e nesërme në Gjirokastër. Përveç mbrojtësit Erjon Xhafa, i cili është dëmtuar në ndeshjen me Kukësin para disa javësh, stafi teknik nuk do të ketë të gatshëm Ruçon dhe porgradecarin Shkullaku. Janë mungesa të rëndësishme, që për një skuadër si Lushnja rëndojnë, pasi nuk e ka luksin të ketë një kontigjent të pasur futbollistësh.
Nga ana tjetër, Luftëtari vjen i plotë në ndeshjen e kësaj jave në shtëpi, pasi mesfushori Aleksi ka shlyer dënimin nga kartonët, kurse mbrojtësi Toledo e ka marrë veten nga dëmtimi.
