Ermela Muhametaj është 27-vjeçarja shqiptare e cila u gjet e pajetë mbrëmjen e 28 prillit në qytezën e Larinos në Itali. Mediat vendase raportuan fillimisht se 27-vjeçarja, nënë e një djali 8-vjeçar kishte vrarë veten. Por me thellimin e hetimeve, kanë dalë në sipërfaqe detaje të reja që rrisin dyshimet se e reja shqiptare të jetë nxitur nga një person për të kryer aktin e rëndë të vetëvrasjes.
Ditën e ngjarjes, 27-vjeçarja i kishte shkruar avokatit të saj në mëngjes një mesazh për të caktuar një takim në lidhje me divorcin nga bashkëshorti i saj, me të cilin jetonte në distancë prej muajsh.
“Hipoteza fillestare është ajo e vetëvrasjes, por në fshat dyshimet dhe pikëpyetjet po rriten: askush nuk beson se një nënë kaq e lidhur me të birin mund të ketë vendosur ta lërë atë. Prokuroria po heton për nxitje për vetëvrasje. Rezultatet e autopsisë janë në pritje, të planifikuara për 2 maj”, raportojnë mediat në Itali.
“A mund të takohemi në studio sot?”, Ky është mesazhi që Ermela Muhametaj, 27-vjeçarja me origjinë shqiptare e gjetur e vdekur në zonën e Larinos, mbrëmjen e 28 prillit, i kishte dërguar herët në mëngjes avokatit të saj i cili e kishte ndjekur atë dhe bashkëshortin e saj në procedurat e divorcit.
Pak pas orës 8 të mëngjesit të së hënës, Ermela nënë e një fëmije gati tetë vjeç – i kërkoi avokatit penal një takim për të folur, me sa duket, rreth ndarjes nga bashkëshorti i saj, me të cilin jetonin në distancë. Ndërkohë që hetuesit janë në pritje të zbërthimit të telefonit të saj dhe analizave të autopsisë me qëllim hedhjen e më shumë drite mbi ngjarjen.
