Në vijim të takimeve me biznesin në Vlorë për të shpjeguar paketën “Paqja Fiskale”, drejtuesi politik i Partisë Socialiste, Bledi Çuçi, është ndalur së fundi në fabrikën e prodhimit të kripës “Alb Sale Vlora”, sipërmarrja e vetme e këtij lloji në Shqipëri që eksporton produktin në disa vende të botës.
“Për këtë 3-vjeçarin e ardhshëm ne do të aplikojmë paketën e “Paqes Fiskale”, e cila lidhet me Tatimin mbi Fitimin e Biznesit. Nëse fiton më shumë se rritja ekonomike vjetore, ti do tatohesh vetëm 5%. Kjo është një e ardhur e mirë që shkon për kompaninë dhe pastaj mund të rishpërndahet për investim apo për rroga më të larta të punëtorëve”, tha Çuçi.
Ai përmendi më tej edhe kapërcimin e madh që Shqipëria ka bërë me rrogat falë politikave të qeverisë, e cila pagën minimale e çoi në 400 euro në muaj dhe nga janari 2026 do ta bëjë 500 euro në muaj.
“Kemi treguar që jemi partnerë shumë të mirë me biznesin sepse ne e kuptojmë shumë mirë që zhvillimi ekonomik nuk vjen dot pa një partneritet të fortë me sipërmarrjen. Qeverisja e Partisë Socialiste me në krye Edi Ramën ka dëshmuar se partneritetin me biznesin e ka një gjë prioritare. Kjo lidhet me një qëllim të vetëm, rritjen ekonomike të Shqipërisë dhe rritjen e mirëqeniës së shqiptarëve. Dëshmi e kësaj është edhe sipërmarrja mjaft e suksesshme e mikut tim, Gerit, e cila njeh vetëm rritje në eksport”, tha Çuçi.
