Në analizën e tij paszgjedhore në “MCN Live”, analisti Aleksandër Çipa ndalet tek qëndrimi i Partisë Demokratike pas rezultatit të zgjedhjeve parlamentare të 11 majit dhe mungesës së një reagimi të qartë nga drejtuesi i saj, Sali Berisha.
Sipas Çipës, vëmendja e publikut nuk është më te fitorja e Partisë Socialiste, por te heshtja e humbësit dhe mungesa e përgjegjësisë politike nga lidershipi i opozitës.
“Heshtja e humbësit është tani në qendër të kureshtjes së opinionit publik. Pritet qëndrimi i Partisë Demokratike pas certifikimit të rezultatit: a do të njihet procesi apo do të kundërshtohet, siç ka ndodhur shpesh në të kaluarën.
Sali Berisha, i rikthyer në krye të PD me premtimin për bashkimin e opozitës, në fakt e ka thelluar fragmentimin, duke zyrtarizuar ndarjen në disa fraksione që, i kanë kushtuar opozitës mandate vendimtare.
Berisha ka përdorur në mënyrë të përsëritur strategjinë e kontestimit të rezultatit zgjedhor si një mënyrë për të qëndruar në lojën politike. Kjo qasje mund të rikthejë opozitën në recidivizmin e tranzicionit të pafund”, tha Cipa.
Çipa shton se kërkimi i alibive politike për të mos e pranuar rezultatin nuk e ndihmon, por e dëmton opozitën, dhe nuk ofron një perspektivë të re për rikonstruktim dhe ringritje.
Në vlerësimin e tij më të fortë, Çipa tha se Berisha nuk ka më hapësirë reale për të ofruar një platformë të re reformuese për opozitën dhe se duhet të largohet.
“Çdo përpjekje për ta zgjatur kohëzgjatjen e tij politike në krye të opozitës është një stagnim. Ai e ka ezauruar kohën e vet politike. Përballë kësaj, opozita ka nevojë për një rikonceptim të thellë: një identitet të ri politik dhe një model të ri organizimi.
Opozita ka nevojë për përmbajtje të re, për një qasje moderne dhe funksionale, që të përfaqësojë me dinjitet alternativën ndaj qeverisjes. Ringritja nuk mund të vijë duke ripërsëritur të njëjtat skema politike që janë konsumuar gjatë periudhës së tranzicionit.
Opozita ka nevojë për një rikonceptim, i mungon një brendi ndryshuese, një thelb i ri që të qeverisë më mirë veten dhe të rikthejë besimin publik, tha Cipa./ MCN
