Një zjarr është përhapur ditën e sotme në vendgrumbullimin e mbeturinave në qytetin e Libohovës, duke krijuar një situatë shqetësuese për banorët e zonës. Flakët kanë përfshirë një sipërfaqe të konsiderueshme, ndërsa tymi po përhapet drejt zonës së banuar, duke ndotur ajrin dhe rrezikuar shëndetin e qytetarëve.
Në vendngjarje ndodhen forca të shumta zjarrfikëse nga Gjirokastra dhe Libohova, si dhe efektivë të Policisë së Shtetit.
Sipas të dhënave në terren, zjarri dyshohet të jetë i qëllimshëm. Autoritetet po punojnë për zbardhjen e plotë të ngjarjes dhe identifikimin e autorëve të mundshëm.
