Një sasi e madhe kannabisi është sekuestruar ditën e sotme në Mallakastër. Lënda Narkotike prodhohej në një parcelë të ngritur në fshatin Çërrilë, konkretisht bëhet fjalë për 1881 fidanë.
Në pranga të policisë kanë rënë dy persona Arben Sulo, 53 vjeç dhe Elidon Shehaj, 34 vjeç, të arrestuar në flagrancë teksa po ujisnin fidanët narkotikë.
Arben Sulo dhe Elidon Shehaj akuzohen për veprat penale “Kultivimi i bimëve narkotike”, ndërsa një procedim penal ka nisur dhe për kryeplakun e fshatit, shtetasin M . Z., 44 vjeç, teksa gjatë kontrollit në banesë iu gjetën dhe u sekuestruan një armë sportive, 12.400 euro, 400 paund dhe rreth 900.000 lekë të reja, të cilat dyshohet se ishin në funksion të kësaj veprimtarie kriminale.
Policia ka bërë me dije se fidanët janë asgjësuar me anë të djegies ndërsa hetimet vijojnë për zbardhjen e plotë të ngjarjes si dhe identifikimin e personave të tjerë të përfshirë në këtë veprimtari kriminale.
“Gjatë kontrolleve, në fshatin Çërrilë, shërbimet e Komisariatit të Policisë Mallakastër gjetën një parcelë me 1881 fidanë të dyshuar narkotikë cannabis sativa. Gjatë ndërhyrjes nga shërbimet e Policisë, në parcelë, u kapën në flagrancë duke ujitur fidanët narkotikë, shtetasit A. S., 53 vjeç, banues në Greshicë dhe E. Sh., 34 vjeç, banues në Çërrilë, të cilët u arrestuan për veprën penale “kultivimi i bimëve narkotike”. Në lidhje me këtë rast u procedua penalisht kryeplaku i fshatit, shtetasi I. S., 63 vjeç, për veprën penale “shpërdorimi i detyrës”.
Gjithashtu, në vijim të veprimeve hetimore, nisi procedimi penal edhe për M. Z., 44 vjeç, banues në Ballsh, ku gjatë kontrollit të banesës, iu gjetën një armë sportive, 12.400 euro, 400 paund dhe rreth 900.000 lekë të reja, të cilat dyshohet se ishin në funksion të kësaj veprimtarie kriminale.
Fidanët narkotikë u asgjësuan me anë të djegies. Vijon puna për dokumentimin e plotë të kësaj veprimtarie kriminale, si dhe për identifikimin dhe kapjen e shtetasve të tjerë që mund të jenë të përfshirë”, thuhet në njoftimin e policisë.
