Ata akuzohen për “shpërdorim detyre” ndërsa shkak kanë qenë një sërë ndërtimesh dhe objektesh pa leje në Drimadhe, Jalë dhe Dhërmi.
Pesë punonjës të Inspektoratit të Mbrojtjes së Territorit dhe drejtuesi i kësaj drejtorie në Bashkinë e Himarës janë pezulluar mëngjesin e sotëm me vendim të kryetarit të bashkisë së qytetit bregdetar, Vangjel Tavo.
Kryebashkiaku i Himarës ka pezulluar nga detyra punonjësit e IMT dhe drejtuesin, ndërsa shkak për këtë kanë qenë një sërë ndërtimesh dhe objektesh pa leje në Drimadhe, Jalë dhe Dhërmi. Raportohet se disa ditë më pare pati edhe procedime penale.
Mbrëmjen e së dielës, në orën 20:00, IKMT prishi 4 struktura në Jalë, ndërkohë që sot do të shembë disa të tjera në Dhërmi dhe Jalë.
Kujtojmë se, një javë më parë, policia e Vlorës arrestoi tre persona për ndërtim pa leje dhe mori hetim dhe katër të tjerë. Bëhet fjalë për shtetasit me iniciale: L. D., 41 vjeç, K. C., 40 vjeç dhe I. Zh., 52 vjeç të cilët janë inxhinierë dhe drejtues teknik të projektit. Dyshohet se ata kanë lejuar punime ndërtimi nga puntorët e tyre në zonat e Jalës dhe Dhërmiut pa pasur dokumentacionin përkatës.
Për këtë vepër penale, në kërkim është shpallur edhe shtetasi L. Gj., banues në fshatin Vuno. Gjithashtu, në lidhje me këto ndërtime pa leje, janë marrë në hetim 4 punonjës të Inspektoratit të Mbrojtjes së Territorit (IMT) në Bashkinë Himarë.
“Specialistët për Hetimin e Krimit Ekonomik e Financiar në DVP Vlorë arrestuan, për veprën penale “Ndërtim i paligjshëm”, kryer për qëllime fitimi, shtetasit L. D., 41 vjeç, K. C., 40 vjeç dhe I. Zh., 52 vjeç, me funksione inxhinier zbatimi dhe drejtues projekti, pasi dyshohet se kanë lejuar punime ndërtimi nga puntorët e tyre, në zonën e Jalës dhe Dhërmiut, pa u pajisur me dokumentacionin përkatës. Për të njëjtën vepër penale u shpall në kërkim edhe shtetasi L. Gj., banues në fshatin Vuno. Gjithashtu, u proceduan penalisht 4 punonjës të IMT-së të Bashkisë Himarë, për veprën penale “Shpërdorimi i detyrës”, konkretisht E. V., 44 vjeç, drejtor i IMT-së, dhe M. K., 30 vjeç, A. J., 27 vjeç, R. K., 30 vjeç, të tre me detyrë inspektorë”, njoftoi policia.
