Mira Murati, emri i njohur shqiptar në botën e teknologjisë dhe një nga figurat kryesore që qëndroi pas zhvillimit të inteligjencës artificiale si ChatGPT, pritet të martohet së shpejti në një ceremoni tërësisht private në Toskanën piktoreske të Italisë.
Sipas A2 CNN, ceremonia po organizohet me një nivel shumë të lartë sigurie dhe privatësie. Të ftuarit janë nënshtruar kontratave të rrepta konfidencialiteti, të cilat ndalojnë publikimin e çdo materiali vizual, foto apo video, në rrjete sociale apo media.
Megjithëse detajet janë mbajtur larg syrit të publikut, mësohet se në dasmë do të përfshihen elemente të trashëgimisë shqiptare. Murati do të veshë një kostum tradicional të nuseve nga jugu i Shqipërisë, me jelekun karakteristik të zonës së Vlorës, si një mënyrë për të nderuar origjinën dhe rrënjët e saj kulturore.
Po ashtu, ceremonia pritet të pasurohet me këngë e valle popullore shqiptare, duke i dhënë asaj një atmosferë autentike e krenare.
