Tensionet në Lindjen e Mesme, kryeministri britanik: Armëpushimi mes Iranit dhe Izraelit duhet të zbatohet patjetër

Kryeministri i Britanisë, Keir Starmer ka thënë se armëpushimi mes Iranit dhe Izraelit duhet të zbatohet patjetër.
“Kjo është mundësi për të garantuar stabilitetin aq të nevojshëm në Lindje të Mesme. Irani nuk duhet të lejohet të zhvillojë armë bërthamore dhe duhet të kthehet në tavolinën negociuese, si dhe të punojë për një zgjidhje afatgjatë”, ka thënë ai në një postim në X – dikur Twitter.
“Ky është mesazhi që jam duke diskutuar me liderë tjerë të NATO-s sot”, ka thënë Starmer, duke iu referuar samitit të NATO-s që do të mbahet në Holandë.
Presidenti i SHBA-ve, Donald Trump, sulmoi ashpër Izraelin dhe Iranin sot, teksa akuzoi të dyja palët për shkelje të armëpushimit.
Izraeli nga ana e tij tha se ka goditur një radar iranian, por është “përmbajtur nga sulme të mëtejshme” pasi kryeministri Benjamin Netanyahu foli me Trumpin.
Izraeli tha gjithashtu se raketat u lëshuan nga Teherani pasi armëpushimi hyri në fuqi, por Irani mohon nisjen e sulmeve të reja ndaj Izraelit.
Gjatë natës, përpara se të konfirmohej armëpushimi, të dyja palët shkëmbyen zjarr, me banorët e Teheranit që thanë se ishin dëshmitarë të një prej sulmeve “më të rënda” nga Izraeli. Zyrtarët vendas thonë se nëntë persona janë vrarë në Iranin verior.
Ndërkohë Shërbimi i emergjencës i Izraelit deklaroi se katër persona u vranë në Beersheba.