Kina pret ministrat e Mbrojtjes së Iranit dhe Rusisë, Pekini: Takimi kundërpeshë ndaj samitit të NATO-s

Një ditë pas samitit të NATO-s që u mbajt në Hagë ku morën pjesë 32-vendet anëtare, përfshi edhe Shqipërinë, ku u vendos rritja e shpenzimeve ushtarake, ditën e sotme Kina ka pritur ministrat e Mbrojtjes së Iranit, Rusisë dhe Indisë.
Takimi që u mbajt në Qingdao, qytetin lindor bregdetar të Kinës, vjen në sfondin e luftës në Lindjen e Mesme, ku Irani dhe Izraeli vendosën armëpushimin mes tyre pas ndërhyrjes dhe sulmit të SHBA-ve ndaj centraleve bërthamore të Teheranit.
Pekini prej kohësh është përpjekur ta paraqesë Organizatën e Bashkëpunimit të Shangait (SCO) me 10 anëtarë si një kundërpeshë ndaj blloqeve të fuqisë të udhëhequra nga Perëndimi dhe ka shtyrë përpara forcimin e bashkëpunimit midis vendeve anëtare në politikë, siguri, tregti dhe shkencë.
Ministri kinez i Mbrojtjes Dong Jun e cilësoi takimin e zyrtarëve të së enjtes në Qingdao, ku ndodhet një bazë e madhe detare kineze, si një kundërpeshë ndaj një bote në “kaos dhe paqëndrueshmëri”.
“Ndërsa ndryshimet e rëndësishme të shekullit përshpejtohen, unilateralizmi dhe proteksionizmi janë në rritje”, tha Dong ndërsa priti shefat e mbrojtjes nga Rusia, Irani, Pakistani, Bjellorusia dhe vende të tjera të mërkurën, sipas agjencisë shtetërore të lajmeve Xinhua.
“Aktet hegjemonike, dominuese dhe ngacmuese dëmtojnë rëndë rendin ndërkombëtar”, paralajmëroi ai.
Ai i nxiti homologët e tij të “ndërmarrin veprime më të fuqishme për të mbrojtur së bashku mjedisin për zhvillim paqësor”.
Ministri i Mbrojtjes i Indisë, Rajnath Singh, gjithashtu i pranishëm në Qingdao, tha se anëtarët e SCO-së duhet “të synojnë kolektivisht të përmbushin aspiratat dhe pritjet e popujve tanë, si dhe të përballen me sfidat e sotme”.
“Bota në të cilën jetojmë po kalon një transformim drastik. Globalizimi, i cili dikur na afroi më shumë, ka humbur vrullin”, tha ai në komentet e postuara nga zyra e tij në rrjetin social ‘X’.
Nga ana tjetr, ministri rus i Mbrojtjes, Andrei Belousov, përshëndeti lidhjet midis dy vendeve si “në një nivel të paparë”.
“Marrëdhëniet miqësore midis vendeve tona ruajnë dinamikën në rritje të zhvillimit në të gjitha drejtimet”, tha ai.
Kina e ka portretizuar veten si një palë neutrale në luftën e Rusisë me Ukrainën, megjithëse qeveritë perëndimore thonë se lidhjet e saj të ngushta i kanë dhënë Moskës mbështetje të rëndësishme ekonomike dhe diplomatike.