Konflikti Iran-Izrael/Autoritetet e Teheranit: 627 persona na u vranë në 12 ditë

Ministria e Shëndetësisë e Iranit ka bërë të ditur se të paktën 627 persona u vranë dhe 4,870 u plagosën në sulmet e kryera nga Izraeli gjatë 12 ditëve të fundit.
Hussein Kermanpur, drejtori i Marrëdhënieve me Publikun në ministri, tha se shumica e vdekjeve ndodhën në kryeqytetin Teheran dhe qytetin Kermanshah në Kurdistanin Lindor.
Si rrjedhojë, 86.1% e viktimave humbën jetën në vendin e sulmeve, ndërsa 13.9% vdiqën gjatë rrugës për në spital ose me të mbërritur.
Midis të vrarëve ishin 35 ushtarë dhe komandantë iranianë.
Gjithashtu, ministria theksoi ashpërsinë e shkatërrimit të shkaktuar nga shpërthimet, mbetjet dhe zjarret.
Nga ana tjetër, 500 vendbanime u dëmtuan rëndë dhe 120 ndërtesa u shkatërruan plotësisht si rezultat i sulmeve, të cilat shënjestruan edhe zonat civile.
Ndërkaq, më herët udhëheqësi suprem i Iranit, Ajatollah Ali Khamenei reagoi për herë të parë publikisht që nga shpallja e armëpushimit Izrael-Iran.
Ai shpalli fitoren ndaj Izraelit dhe tha se vendi i tij i kishte “dhënë një shuplakë në fytyrë Amerikës”.
Khamenei foli në një video të transmetuar në televizionin shtetëror iranian dhe kjo është paraqitja e tij e parë që nga 19 qershori, i cili dukej më i lodhur sesa një javë më parë. Ai u tha shikuesve se SHBA-të kishin ndërhyrë në luftë vetëm sepse “mendonin se nëse nuk ndërhynin, regjimi sionist do të shkatërrohej plotësisht”.
Megjithatë, sipas tij, SHBA-të “nuk arritën të fitonin asgjë nga kjo luftë”.
“Republika Islamike ishte fitimtare dhe, në shenjë hakmarrjeje, i dha një shuplakë në fytyrë Amerikës”, tha ai, duke iu referuar me sa duket një sulmi me raketa iraniane në një bazë amerikane në Katar të hënën, i cili nuk shkaktoi viktima.
Khamenei 86-vjeç nuk është parë në publik që kur u strehua në një vend të fshehtë pas shpërthimit të luftës më 13 qershor, kur Izraeli sulmoi objektet bërthamore iraniane dhe shënjestroi komandantët e lartë ushtarakë dhe shkencëtarët.