Europa mbërthehet nga i nxehti! Zjarre në Turqi e Greqi, temperatura 44 gradë në Portugali

Europa po mbyll një javë përvëluese me temperatura që i kaluan 40 gradë Celsius dhe që shkaktuan zjarre në disa rajone të kontinentit.
Më të forta zjarret kanë qenë në Turqi, ku u raportuan vatra të fuqishme në Izmir, Bursa, Tekirdag, Sakarya dhe Adana. Një operacion i gjerë i autoriteteve është vënë në lëvizje për përballimin e situatës. Një avion zjarrfikës u rrëzua në Adana teksa merrte ujë në një digë, ndërsa vijojnë kërkimet për pilotin.
Edhe në Greqi nuk kanë munguar vatrat e zjarreve. Shumë athinas nxituan drejt plazheve, ndërsa vala e parë e madhe e nxehtësisë e vitit goditi vendin. Termometri shënoi mbi 40 gradë.
Turistët dhe vendasit, si në Spanjë ashtu edhe në Portugali, e kanë pasur të pamundur lëvizjen gjatë ditës me temperatura ekstreme deri në 44 gradë Celsius. Autoritetet portugeze paralajmëruan se i nxehti do të përfshijë të gjithë vendin.
Ato u kanë kërkuar qytetarëve të qëndrojnë vigjilentë dhe të shmangin aktivitetet që mund të shkaktojnë zjarre, duke paralajmëruar se kushtet e thata dhe erërat e forta mund të ushqejnë flakët.