Laboratorët e fshehur nën tokë…pse SHBA-të nuk hodhën superbomba mbi Isfahan?

Forcat Ajrore të SHBA-së nuk hodhën superbombat mbi sitin bërthamor të Isfahanit, pasi laboratorët ndodhen shumë thellë nën tokë, që nuk mund të goditen nga një sulm ajror.
Kjo u bë e ditur nga kreu i Shtabit të Përgjithshëm, Dan Caine, gjatë një mbledhjeje të mbyllur në Kongres. Sipas CNN, ky detaj shpjegon arsyet pse operacioni amerikan nuk arriti të godasë plotësisht të gjitha instalacionet kyçe për programin bërthamor iranian.
Rreth 400 kilogramë uranium i pasuruar besohet të jenë transferuar para sulmit dhe mund të jenë në bunkerin e Isfahanit ose në atë të Natanzit, të vendosur pjesërisht nën tokë dhe të mbrojtur nga superbombat GBU-57 të përdorura nga avionët B-2. SHBA-ja ka goditur me superbomba vetëm malësinë e Fordow dhe Natanzit, ndërsa Isfahani u sulmua me rreth 30 raketa cruise nga një nëndetëse.
Ndërsa sulmet, përfshirë edhe ato izraelite, kanë shkaktuar dëme të dukshme në sipërfaqe, efektet e brendshme ende nuk janë të qarta. Donald Trump i quajti sulmet një sukses total, ndërsa Agjencia Ndërkombëtare për Energjinë Atomike (AIEA) konfirmoi dëme të konsiderueshme. Vlerësimet paraprake të inteligjencës ushtarake dhe më pas korrigjimet e CIA-s janë më të kujdesshme në lidhje me ndikimin në ngadalësimin e programit iranian, duke shkuar nga disa muaj deri në tri vjet. Këto interpretime ndikohen edhe nga përplasjet politike.
Fotot satelitore të reja tregojnë punime pranë hyrjeve të disa tuneleve në Isfahan, ndërsa ekspertët mendojnë se disa prej tyre janë të aksesueshme, ndërsa të tjerat mbeten të mbyllura.
Drejtori i AIEA, Rafael Grossi, theksoi se nuk është e qartë nëse një sasi e madhe uraniumi i pasuruar është zhvendosur apo është shkatërruar dhe nënvizoi përpjekjet e Iranit për të mbrojtur sektorin strategjik dhe për të parashikuar lëvizjet e armikut.