Karteli Sinaloa përdori të dhënat e telefonit dhe kamerat e sigurisë për të zbuluar informatorët e FBI

Një haker që punonte për kartelin famëkeq të drogës Sinaloa në Meksikë arriti të siguronte të dhënat telefonike të një zyrtari të FBI-së dhe të përdorte kamerat e sigurisë të qytetit të Meksikos për të gjurmuar e më pas për të eliminuar bashkëpunëtorët e mundshëm të agjencisë në vitin 2018, thuhet në një raport të publikuar të enjten nga Departamenti Amerikan i Drejtësisë.
Zbulimi i incidentit u bë publik në një audit të Inspektorit të Përgjithshëm të Departamentit të Drejtësisë mbi përpjekjet e FBI-së për të menaxhuar pasojat e “mbikëqyrjes teknike të kudondodhur”, një term që përfshin përhapjen masive globale të kamerave dhe tregtisë së të dhënave të komunikimit, udhëtimit dhe vendndodhjes.
Sipas raportit, hakeri punonte për kartelin e drejtuar nga Joaquín “El Chapo” Guzmán, kreu i njohur i organizatës Sinaloa, i cili u ekstradua në SHBA në vitin 2017.
Raporti tregon se hakeri kishte identifikuar një atashe ligjor ndihmës të FBI-së pranë Ambasadës Amerikane në Qytetin e Meksikos dhe kishte arritur të përdorte numrin e tij të telefonit për të marrë informacion mbi thirrjet e bëra dhe të marra, si dhe të dhëna të sakta të vendndodhjes.
Për më tepër, ai kishte përdorur sistemin e kamerave të qytetit për ta ndjekur zyrtarin në terren dhe për të identifikuar personat me të cilët ai takohej.
“Karteli përdori këtë informacion për të frikësuar dhe, në disa raste, për të vrarë burime të mundshme apo dëshmitarë bashkëpunues,” thuhet në raport.
As emri i hakerit, as i zyrtarit të FBI-së dhe as i viktimave nuk janë bërë publikë.
Ambasada e SHBA-ve në Meksikë nuk komentoi, duke ia kaluar pyetjet Departamenteve të Shtetit dhe të Drejtësisë, të cilat nuk dhanë përgjigje të menjëhershme. Po ashtu, as FBI-ja dhe as avokati i El Chapos nuk dhanë koment.
Ky rast vë në dukje një sfidë në rritje për shërbimet e inteligjencës dhe agjencitë ligjzbatuese në mbarë botën. Kombinimi i të dhënave të detajuara të vendndodhjes nga telefonat celularë dhe prania masive e kamerave të sigurisë ka bërë që identiteti i informatorëve të jetë më i prekshëm se kurrë.
Raporti thekson se përparimet teknologjike kanë bërë që edhe shtete më pak të zhvilluara apo organizata kriminale të jenë në gjendje të identifikojnë dhe shfrytëzojnë dobësitë në këtë “ekonomi globale të mbikëqyrjes”.
FBI, sipas dokumentit, është duke zhvilluar një plan strategjik për të zbutur këto rreziqe dhe janë bërë disa rekomandime, përfshirë rritjen e trajnimit për personelin e saj.