Trump: Nuk po i ofroj asgjë Iranit! S’jam si Obama!

Presidenti amerikan Donald Trump ka reaguar me tone të ashpra në rrjetet sociale ndaj senatorit demokrat Chris Coons, duke mohuar kategorikisht se po kërkon marrëveshje me Iranin, siç është sugjeruar në disa raportime mediatike.
“Thuajini senatorit demokrat fallco Chris Coons se nuk po i ofroj Iranit asnjë gjë! Nuk jam si Obama që u dha miliarda dollarë në kuadër të marrëveshjes idiote për armën bërthamore. As nuk jam duke folur me ta, që kur ua shkatërruam totalisht objektet bërthamore,” shkroi Trump në rrjetet sociale.
Kjo deklaratë vjen pas intervistës së senatorit Coons në Fox News, ku ai referoi raportime që sugjeronin se Trump “po lëviz drejt negociatave dhe po i ofron Iranit një marrëveshje që ngjan me atë të Obamës: dhjetëra miliarda dollarë stimuj dhe lehtësime të sanksioneve, në këmbim të ndalimit të programit bërthamor”.
JCPOA, marrëveshja bërthamore që administrata Obama nënshkroi me Iranin në vitin 2015, u la nga vetë Trump gjatë presidencës së tij në vitin 2018, me akuzën se ajo nuk parandalonte realisht ambiciet bërthamore të Teheranit.
Që prej asaj kohe, tensionet SHBA-Iran kanë qenë të larta, veçanërisht pas ndërhyrjeve ushtarake dhe sanksioneve të rënda ndaj regjimit iranian.
Trump ka theksuar se nën udhëheqjen e tij, objektet bërthamore iraniane janë “shkatërruar plotësisht” dhe se nuk ka interes të hyjë në bisedime që, sipas tij, do t’i vendosnin SHBA-të në pozitë të dobët.