Dukej se gjithçka ishte gati për kalimin e Lorenzo Luccas te Napoli, por klubi napolitan nuk ka vepruar në kohë. Pas interesit të Atalantës dhe Atletico Madrid, tani hyn në garë edhe Milani për sulmuesin e Udineses. Pikërisht kuqezinjtë janë në kërkim të një sulmuesi që të shoqërojë Santiago Gimenez sezonin e ardhshëm.
Sipas raportimeve të fundit, drejtori sportiv Igli Tare ka nisur kontaktet me përfaqësuesit e Luccas për të kuptuar mundësinë e transferimit. Megjithatë, operacioni është i kushtueshëm, pasi Udinese nuk pranon të heqë dorë nga sulmuesi për më pak se 35 milionë euro.
Strategjia e Milanit
Milani mund të vendosë të shpejtojë tratativat për të parandaluar konkurrencën, sidomos nga Napoli, që aktualisht është i përqendruar në tratativa të tjera dhe po pret të shesë Osimhen përpara se të shtojë një tjetër sulmues përkrah Lukakut.
Vetë Lucca, i lindur në vitin 2000, ende nuk ka dhënë një sinjal të qartë për të ardhmen, ndërsa Udinese shpreson të ndezë një ankand mes klubeve të interesuara.
