Nikita Andreyev, trajneri i Nomme Kalju, iu përgjigj pyetjeve të gazetarëve para ndeshjes ndaj Partizanit në Conference League.
“Kjo është eksperienca ime e parë duke drejtuar një skuadër në Europë. Unë kam pasur mundësinë të luaj disa ndeshje të tilla gjatë ditëve të mia si lojtar dhe e di se si janë ato dhe çfarë ndjejnë lojtarët. Kalju ka kujtime të mira nga Europa, edhe pse për fat të keq nuk ia kanë dalë të kualifikohen në vitet e fundit. Por ne jemi gati të nisim një kapitull të ri.
Mendoj se lojtarët po e presin këtë moment, për disa prej tyre, kjo është ndeshja e parë e karrierës në Europë. Sipas mendimit tim, ky është një vend i mirë që të rinjtë të tregojnë cilësitë që kanë dhe dëshirën që kanë. Skautë dhe menaxherë interesohen për ndeshje të tilla. Lojtarët tanë ambiciozë duian të tregojnë se mund të luajnë në nivel më të lartë. Kjo është mundësia e tyre që t’ia tregojnë veten të gjithë Europës.
Ndeshja nuk do të transmetohet? Ato që kanë dashur, e kanë gjetur një mënyrë si të mbërrijnë në Talin dhe të ndjekin këtë ndeshje. Ndonëse ne kemi përballë një klub shumë të fortë me histori të madhe, ne duam të kalojmë në turin tjetër. Ne duhet të tregojmë lojën tonë më të mirë për të arritur objektivin që kemi.
Përgatitja? Ndjesia që të luash në Ligën e Konferencës kalon çdo gjë. Në këtë ndeshje, lojtarët nuk ndjejnë lodhje, nuk mund të jenë nervozë, duhet të dalin në fushë dhe të shijojnë ndeshjen.
Mendoj se kemi bërë një përgatitje të mirë para ndeshjeve të fundit në kampionat. Padyshim ritmi në ndeshjet europiane është i ndryshëm nga ai i kampionatit estonez. Njëkohësisht, ne kemi pasur ndeshje me ritëm dhe me cilësi të lartë në kampionat këtë vit, gjë që na ka përgatitur për Europën.
Klubet nga Ballkani janë mendërisht të forta, ata janë luftëtarë. Ne e kemi parë që Partizani është një ekip shumë i organizuar, që preferon të luajë me një linjë të ulët mbrojtëse dhe të mbështetet te kundërsulmet. Ata kanë skuadër dhe cilësinë individuale që të shfrytëzojnë një apo dy raste që mund t’i shfaqen gjatë ndeshjes. Ne e dimë që atyre iu larguan disa lojtarë dhe shumë të tjerë erdhën. Ata vijnë këtu vetëm me fazën përgatitore, por mendoj se në një turne të tillë nuk ka justifikime”, tha trajneri Andrejev.
