Garë pas gare, event pas eventi, Mark Markez ose thyen rekorde ose u afrohet momenteve që dukeshin të paarritshme… për shkak të dëmtimit të krahut të djathtë, një problem që i kushtoi disa sezone në Moto GP dhe për pak edhe karrierën.
Të dielën në Saksenring, në mbretërinë e tij, ai e shkatërroi kronometrin, duke arritur vendin e parë, xhiron më të shpejtë dhe kryesimin në çdo xhiro, pa harruar edhe të shtunën me “pole position” dhe triumf në Sprint.
AGOSTINI DHE ROSI, SFIDA – Për Markezin, në Gjermani ishte fitorja e tij e nëntë në klasin premier, e 12- ta në total, pasi ka fituar një në 125 c dhe dy të tjera në Moto 2. Vetëm Xhakomo Agostini ka më shumë në një pistë në klasin e parë, me dhjetë sukseset e tij në Imatra të Finlandës. Pra, Mark tashmë ka një sfidë për vitin 2026. “A po negocion Saksenringu një rinovim? Nëse më duhet të investoj para, do ta bëj”, deklaroi me shaka spanjolli.
Por tashmë Markez e ka tejkaluar Agostinelin në një aspekt tjetër: pasi e barazoi atë me 68 fitore në klasin e parë në Asen, e la pas në Gjermani, duke shënjestruar triumfin e 69-të, ndërsa ndodhet 20 suksese pas Valentino Rosit. “Doktorin” mund ta arrijë këtë vit, por ai mund të barazojë 7 titujt në Moto GP të italianit dhe 9 në total. Ky “limit” është më afër: “Është e rëndësishme të vazhdoj të shijoj motorin, dhe këtë vit po e shijoj vërtet. Marrja e fitores në Çmimin e Madh të 200-të të Moto GP do të thotë se jam ende në formë shumë të mirë”, tha Markez pas triumfit të së dielës në Gjermani.
PISTA PERFEKTE – Për garën gjermane, ka pak për të thënë, sepse ai nuk u dha asnjë shans rivalëve. “Kaluam një fundjavë perfekte, pa e ekzagjeruar”, përmblodhi piloti i Dukatit, duke theksuar se ka mësuar nga Ostin dhe Herezi, ku ishte favorit dhe u rrëzua. Në fakt, edhe shiu i mëngjesit e ndihmoi, kishte më pak kontroll, dhe ai është gjithashtu më i miri në këtë. “Kur arrin në një pistë që të pëlqen, ajo përshtatet me stilin tënd të drejtimit dhe të përshtatet në mënyrë të përkryer, edhe duke pasur parasysh kushtet, sepse ishte e rrëshqitshme, e shtyn veten deri në limitin tënd, ndihesha rehat”, pranoi 32-vjeçari.
DRAMA E KTHESËS 1 – Pati shumë drama në Kthesën 1 në Saksenring, me një festival rrëzimesh, por jo për Markezin. Di Xhanantonio u rrëzua ndërsa ishte i dyti. “Frenova pesë metra më vonë dhe me dy kënde të tjera të pjerrëta”, zbuloi Fabio. Më pas ishte radha e Bexekit, i cili trashëgoi pozicionin e bashkëkombësit të tij, por e dorëzoi shpejt, duke përfunduar edhe a KO: “Ishte një gabim i vogël, gjëra që ndodhin. Pas Di Xhanantonios u përpoqa të frenoja më pak atje, por duhet të frenosh”, shpjegoi Bexeki. Megjithatë, Markezi “i vjetër” nuk gaboi: “Ajo kthesë ishte kritike sepse nuk kishte gomë për shkak të shiut. Që nga fillimi, pashë se nuk kishte kontroll atje. Kjo më dha përqendrim shtesë” rrëfeu lideri i kampionatit.
MË I SAKTË SE KURRË – Në Saksenring ishin 30 xhiro shou me precizion. “Është vetëm në këtë cirkuit, në të tjera, si Asen, përpiqem të jem i saktë, por nuk është më e mira e drejtimit tim. Këtu isha i saktë sepse nuk isha në limit, këtu gjithçka ishte fluide”, u shpreh Mark Markez, i cili e thelloi në 83 pikë epërsinë në renditje nga vëllai i tij, Alex. Një Markez rekordesh, që mbërriti në finish me më shumë se 6 sekonda avantazh. Në vitin 2014, ai fitoi 10 gara radhazi, në vitin 2019 theu rekordin e pikëve, ndërsa tani është në një nivel tjetër, pa limite.
