Mesjava e turit të dytë në Europë sheh të luhen 73 ndeshje në të tre kompeticionet e klubeve të organizuara nga UEFA. Luhen 14 sot, 8 të mërkurën dhe plot 51 të tilla të enjten. Dhe për Shqipërinë mund të jenë vendimtare.
Pas eliminimit të Partizanit, në garë kanë mbetur Egnatia, Dinamo dhe Vllaznia, të tre në garë në Ligën e Konferencës. Dhe skuadrat shqiptare, duke parë ecurinë dhe shortin e skuadrave të vendeve të tjera, duhet të sigurojnë rezultate, përndryshe rrezikojnë renditjen e kampionatin tonë në UEFA.
Shqipëria e nis këtë mesjavë në vendin e 45-të, në klasifikimin që merr për bazë rezultatet pozitive të skuadrave të kampionateve. Bilanci i deritanishëm i Shqipërisë nuk është ndër më të mirët: 2 fitore, 1 barazim e tre humbje janë rezultatet e klubeve shqiptare, që kanë siguruar deri tani vendin e 45-të, por jo sigurinë se mund të shpëtojnë nga “rënia nga kategoria”.
Nëse kampionati shqiptar bie poshtë vendit të 50-të në Europë, atëherë pas dy sezonesh, Shqipëria do të jetë me vetëm 3 skuadra në Europë e jo me 5 të tilla. Do të ishte një goditje shumë e rëndë për futbollin shqiptar dhe të ardhurat që ai siguron nëpërmjet pjesëmarrjes në kompeticionet evropiane. Një goditje që duhet shmangur me çdo kusht nëpërmjet rezultateve pozitive në dy javët e ardhshme nga tre klubet që kanë mbetur në garë.
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
