Politikat e Trump godasin të ardhurat e Teslas, fitimet bien me 23% në tremujorin e dytë

Tesla ka paralajmëruar një tjetër rënie të të ardhurave për shkak të politikave tregtare dhe ligjit të ri fiskal të Presidentit Donald Trump, që përfshin uljen e stimujve për makinat elektrike dhe heqjen e gjobave për ndotësit. Këto masa kërcënojnë një burim të rëndësishëm fitimi për Tesla-n, shitjen e kredive rregullatore dhe kanë thelluar përplasjet midis Elon Musk dhe presidentit.
“Jemi në një periudhë ku do të humbasim shumë nga stimujt në SHBA,” tha Musk, duke paralajmëruar se kompania mund të përjetojë disa tremujorë të vështirë. Aksionet e Tesla-s ranë mbi 4% pas deklaratave të tij dhe janë ulur me 30% që nga dhjetori.
Ndikimi politik është shoqëruar edhe me probleme të brendshme: shitjet kanë rënë për shkak të konkurrencës në rritje dhe modelit të vjetëruar të automjeteve. Kompania raportoi fitim neto prej 1.4 miliardë dollarësh për tremujorin e dytë, një rënie me 23% krahasuar me një vit më parë. Të ardhurat zbritën me 12% në 22.5 miliardë dollarë dhe marzhi operativ ra në 4.1%.
Tesla përballet me sfida shtesë për shkak të tarifave ndaj baterive të importuara nga Kina, që i kushtuan 300 milionë dollarë vetëm në tremujorin e dytë. Gjithashtu, heqja e kredive rregullatore uli të ardhurat nga 882 milionë në 439 milionë dollarë. Vitin e kaluar, kompania kishte përfituar 2.8 miliardë dollarë nga këto kredi.
Për të rigjallëruar shitjet, Tesla synon të nisë prodhimin e një modeli të ri ekonomik në gjysmën e dytë të vitit. Musk po promovon gjithashtu të ardhmen e kompanisë në drejtim të teknologjisë robotaxi dhe robotëve Optimus me inteligjencë artificiale.
Megjithatë versionin e përmirësuar të Model Y, shitjet në Evropë kanë rënë. Tesla raportoi 384,122 automjete të shitura në tremujorin e fundit, 13% më pak se një vit më parë dhe nën pritshmëritë e analistëve. Kompania nuk dha projeksione për prodhimin e ardhshëm, për shkak të pasigurisë ekonomike.