Alarm në SHBA, 55-vjeçari ndihmohet nga inteligjenca artificiale për të prodhuar bomba

Prokurorët federalë kanë ngritur padi ndaj 55-vjeçarit Michael Gann nga Long Island, Nju Jork, për prodhimin e shtatë bombave në shtëpi.
Ai pretendon se inteligjenca artificiale e ndihmoi gjatë gjithë procesit dhe e përshkroi krijimin si më të lehtë sesa blerja e barutit, raporton NBC, përcjell KosovaPress.
Sipas zyrtarëve, Gann transportoi bombat në Nju Jork dhe ruajti pesë prej tyre, së bashku me katër gëzhoja pushke, në çatinë e një ndërtese në lagjen luksoze Soho të Manhattanit. Plani i tij ishte të kombinonte municionin me një ose më shumë pajisje shpërthyese të improvizuara.
Dyshimi u nxit më tej nga postimet e tij në internet. Gann shkroi një mesazh shqetësues në profilin zyrtar të Donald Trump në rrjetet sociale X më 27 mars dhe u arrestua pesë javë më vonë pasi postoi në Instagram: “Kush do që unë të shkoj të luaj sikur nuk ka të nesërme?”
Gann ende nuk është deklaruar fajtor dhe avokati i tij nuk pranoi të komentojë.
Ai pranoi para hetuesve se përdori dy përbërës shtëpiakë për të bërë eksplozivët, të cilët i porositi në internet.
Hetimi zbuloi detaje shqetësuese. Një dëshmitar, një veteran i ushtrisë, i tha FBI-së se Gann, ndërsa përziente eksplozivë, i tha: “Çfarë lloj veterani je ti? Sheh një problem në lagje dhe nuk bën asgjë”, pas së cilës ai tregoi me gisht nga një shkollë hebraike aty pranë.
Dëshmitari i dytë pranoi të bashkëpunonte me FBI-në dhe regjistroi biseda telefonike me Gann. Në njërën prej tyre, Gann pranoi se kishte aktivizuar tashmë një pajisje pranë lumit East, e cila dyshohet se e kishte frikësuar. Ai pretendoi se pas kësaj kishte menduar të hiqte qafe bombat e mbetura.
Gann u arrestua më 5 qershor, ndërsa po ecte në rrugë me një çantë në dorë. Pasi iu lexuan të drejtat e tij, ai pranoi se donte të bënte piroteknikë dhe se përdori inteligjencën artificiale për të mësuar se cilat kimikate të blinte dhe të përziente.