Takimi mes von der Leyen dhe Trump, çfarë pritet të ndodhë të dielën në Skoci

Presidentja e Komisionit Europian, Ursula von der Leyen, do të udhëtojë këtë të diel në Skoci, ku do të zhvillojë takimin e saj të parë zyrtar dypalësh me Presidentin e SHBA-së, Donald Trump.
Në qendër të bisedimeve pritet të jenë marrëdhëniet tregtare mes dy anëve të Atlantikut, dhe shumëkush pret që të dy liderët të nënshkruajnë një marrëveshje për vendosjen e një tarife bazë prej 15% për produktet europiane.
Detajet për sektorët e prekur ende nuk janë bërë të ditura në mënyrë të qartë, ndërsa nga të dyja palët nuk ka shumë koment publik. Edhe vetë presidenti amerikan, përpara nisjes drejt Mbretërisë së Bashkuar, është shprehur me rezervë: “Ka 50 me 50, ndoshta edhe më pak, gjasa për të arritur një marrëveshje tregtare me Bashkimin Europian”.
Lajmi për takimin është bërë i ditur nga vetë von der Leyen përmes një postimi në rrjetin social X: “Pas një telefonate të mirë me presidentin e SHBA-së, kemi vendosur të takohemi të dielën në Skoci për të diskutuar mbi marrëdhëniet tregtare transatlantike dhe se si mund t’i ruajmë ato të forta”.
Nga ana e Komisionit Europian është sqaruar se takimi zhvillohet “me ftesë” të presidentit Trump.