Tajlanda dhe Kamboxhia falenderuan Trump për thirrjet për armëpushim, por sulmet nuk u ndalën!

Presidenti amerikan Donald Trump bëri thirrje urgjente për një armëpushim të menjëhershëm mes Tajlandës dhe Kamboxhias, pas përleshjeve të rënda kufitare që kanë shkaktuar dhjetëra viktima dhe mijëra të zhvendosur.
Gjatë një vizite private në fushat e golfit në Skoci, Trump njoftoi në rrjetin e tij social se ka telefonuar liderët e të dy vendeve, duke theksuar se “ata janë dakord të takohen menjëherë për të punuar drejt armëpushimit dhe paqes”.
Kamboxhia pranoi menjëherë propozimin për armëpushim, ndërsa Tajlanda u shpreh se është e gatshme për një armëpushim, por kërkon fillimisht një dialog të sinqertë mes palëve. Megjithatë, zjarret dhe sulmet vazhduan gjatë natës në vijën kufitare.
Kryeministri kamboxhian Hun Manet vlerësoi ndërmjetësimin e Trump si një mundësi për të shpëtuar jetë ushtarësh dhe civilësh, ndërsa kryeministri në detyrë i Tajlandës, Phumtham Wechayachai, theksoi se armëpushimi duhet të shoqërohet me vullnet të qartë nga pala kundërshtare.
Ndërkohë, Trump u shpreh optimist për rifillimin e negociatave tregtare me dy vendet, por shtoi se këto bisedime nuk do të zhvillohen derisa “lufta të ndalet”. Kjo ndërhyrje e tij vjen vetëm një javë para se të hyjnë në fuqi tarifat doganore amerikane prej 36% ndaj importeve nga Tajlanda dhe Kamboxhia.
Përplasjet mes fqinjëve kanë nisur që më 24 korrik dhe lidhen me pretendimet për shkelje të marrëveshjeve të mëparshme në zonat kufitare, duke përfshirë përdorimin e dronëve nga Tajlanda dhe avancimin ushtarak kamboxhian pranë një tempulli.
Historia e konflikteve për kufijtë mes Tajlandës dhe Kamboxhias shtrihet në më shumë se një shekull, që nga koha e vendosjes së kufijve pas periudhës koloniale franceze.