Ironi e fatit apo jo, por goli i parë sezonal i Mirlind Dakut vjen pikërisht kundër ekipit që e kërkoi me insistim gjatë verës, Zenit, por në fund kërkesat e Dakut u vlerësuan të larta duke bërë që transferimi të dështonte. Daku vendosi të qëndrojë te Rubin Kazan, duke rinovuar kontratën dhe nuk kishte mënyrë më të bukur për të heshtur gjigandët nga Shën Petersburg se sa një gol në minutën e 90-të, në javën e dytë të kampionatit.
Rubin përjetoi makthe në fillim, ku Zenit realizoi dy gola të shpejtë që në pjesën e parë. Në fraksionin e dytë stafetën e morën më pas futbollistët shqiptarë, me dy gola thuajse identik, me kokë. Veldin Hoxha ngushtoi fillimisht shifrat në minutën e 47-të.
Atëherë kur gjërat po shkonin drejt fundit, në minutën e 90-të, Daku me një goditje perfekte me kokë brenda në zonë dërgoi topin në rrjetë duke barazuar rezultatin në 2-2, një gol i veçantë për “bomberin” kuqezi që solli festë në radhët e Rubin Kazan, me këta të fundit që i bëjnë një nisje të mirë këtij sezoni, 4 pikë në 2 ndeshje.
Festa ishte e madhe edhe në dhomat e zhveshjes, ku si gjithnjë edhe këtu Daku ishte protagonist.
(BalkanWeb)
