Skuadra e Dinamos do t’i japë lamtumirën dy prej elementëve më cilësorë që ka në përbërjen e saj. Peter Itodo Mandela dhe Baton Zabërgja, do të largohen nga blutë, pasi kanë gjetur akordin me klubin ku do të vazhdojnë karrierën e tyre.
Sipas asaj që bëjnë të ditur mediat në Ukrainë, të dy lojtarët do të bëhen pjesë e klubit të Metalist 1925 që sapo është ngjitur ne elitën e futbollit atje. Klubi në fjalë ka blerë Ermir Rashicën dhe Kristian Mbanë në fillimin e këtij viti e tashmë duket se ka siguruar edhe firmat e Mandelës dhe Zabërgjës të cilët ndiqeshin edhe nga klube të tjera.
Të njëjtat burime bëjnë të ditur se akordi mes palëve është arritur dhe se tani të dy lojtarët do të bëhen pjesë e klubit ukrainas, por pa specifikuar se kur do të ndodhë ky transferim. Pritet që lëvizja e tyre drejt Ukrainës të ndodhë të paktën pas përfundimit të ndeshjes së kthimit në Ligën e Konferencës të Dinamos ndaj Atletik D’Eskaldes.
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
