Bisedimet Kinë – SHBA , palët e njohin plotësisht rëndësinë e ruajtjes së marrëdhënieve ekonomiko-tregtare të qëndrueshme

Ekipet kineze dhe amerikane zhvilluan diskutime “të thella, të sinqerta dhe konstruktive” mbi ekonominë dhe tregtinë, gjatë një dite e gjysmë të kaluar në Stokholm, tha të martën një zyrtar i lartë kinez.
Li Chenggang, përfaqësues i tregtisë ndërkombëtare të Kinës për Ministrinë e Tregtisë, njëkohësisht zv/Ministër i kësaj ministrie, i bëri deklaratat gjatë një konference shtypi pas takimit të mekanizmit të konsultimeve ekonomiko-tregtare mes Kinës dhe SHBA-së në Stokholm të Suedisë.
Sipas Li, bisedimet vijuan pas konsensusit të arritur gjatë telefonatës mes dy krerëve të shteteve më 5 qershor.
“Ekipet ekonomike dhe tregtare të të dy vendeve zhvilluan diskutime të thelluara, të sinqerta dhe konstruktive mbi çështje kryesore me interesa të ndërsjella, në kuadër të mekanizmit të konsultimit ekonomik dhe tregtar Kinë-SHBA”, tha ai, duke vënë në dukje se palët e njohin plotësisht rëndësinë e ruajtjes së marrëdhënieve ekonomiko-tregtare të qëndrueshme dhe të shëndetshme mes Kinës dhe SHBA-së.Ai tha se palët zhvilluan shkëmbime gjithëpërfshirëse mbi politikat makroekonomike reciproke, si edhe rishikuan progresin gjatë zbatimit të konsensuseve të arritura në Gjenevë dhe Londër, duke vlerësuar rezultatet pozitive.
Li tha se Kina dhe Shtetet e Bashkuara kanë rënë dakord të zgjasin pauzën në lidhje me “tarifat reciproke” prej 24% të vendosura nga ShBA, si edhe kundërmasat e Kinës.
Zyrtari i lartë i Kinës vuri gjithashtu në dukje se ekipet ekonomike e tregtare kineze dhe amerikane do të mbajnë kontakte të ngushta, do të zhvillojnë shkëmbime në kohë mbi çështjet përkatëse dhe do të vazhdojnë të çojnë përpara zhvillimin e qëndrueshëm dhe të shëndetshëm të marrëdhënieve tregtare dypalëshe.