Ballkani/ Mijëra hektarë tokë në flakë, shtëpi të shkrumbuara e njerëz të pastrehë

Gjatë dhjetë ditëve të fundit, shumë zona në Bullgari janë përfshirë nga flakët. Popullsia është njoftuar në kohë përmes aplikacionit zyrtar “BG Alert”, por dëmet janë të mëdha.
Deri tani nuk raportohet për të plagosur, por shumë njerëz kanë humbur shtëpitë dhe pasuritë e tyre. Një nga zonat më të goditura është fshati Rani Lug, pranë kufirit me Serbinë, ku thuajse të gjitha shtëpitë janë shkatërruar.
Fshati që u shua në pak orë
Një banor i Rani Lug e përshkruan situatën me këto fjalë:
“Ishte ferr! Gjithçka po digjej. Tetë shtëpi përreth nesh u shkatërruan. Zjarri ishte mbi tre metra i lartë.”
Ai shton se nuk kishin asnjë mundësi për ta ndalur zjarrin. Zjarrfikësit ishin të mbingarkuar, ndërsa vullnetarët kishin vetëm lopata dhe bidona me dhjetë litra ujë.
“Fshati u dogj. Shtëpitë u shkatërruan. Gjithçka u dogj.”
Zjarret në përhapje, pajisje të pakta për zjarrfikësit
Megjithëse më shumë se 150 vatra zjarri janë shuar në gjithë vendin, dy zjarre të mëdha në jugperëndim të Bullgarisë janë ende aktive dhe jashtë kontrollit.
Një zjarrfikës vullnetar në Rani Lug thotë se situata është tragjike, pasi pajisjet janë të pakta dhe kushtet shumë të vështira:
“Do të ketë zjarr edhe për një muaj tjetër. Nëse ka ujë, do të luftojmë gjithë natën. Por ujin duhet ta sjellim nga 15 kilometra larg.”
Ndihma nga Bashkimi Europian
Për shkak të gjendjes alarmante, Bullgaria ka kërkuar ndihmë nga Bashkimi Europian. Aktualisht, pesë helikopterë nga Sllovakia, Hungaria, Franca, Republika Çeke dhe Rumania janë duke ndihmuar në operacionet për shuarjen e flakëve. Një helikopter tjetër pritet të vijë nga Suedia.
Ndërkohë, Maqedonia e Veriut ka kërkuar gjithashtu ndihmë. Sllovenia ka nisur 50 zjarrfikës drejt këtij vendi fqinj, që për momentin ka vetëm dy avionë operativë për fikjen e zjarreve.
Kreu i Mbrojtjes Civile të Bullgarisë, Alexander Dzhartow, ka paralajmëruar se sezoni i zjarreve është larg fundit. Ai thotë se po punohet intensivisht në terren, me operacione tokësore dhe ajrore, por moti nuk po ndihmon:
“Parashikimi është shumë i keq. Erërat do të jenë të forta dhe drejtimi i tyre do të ndryshojë vazhdimisht, nga veriu në jug dhe anasjelltas, duke e bërë edhe më të vështirë shuarjen e zjarreve.”
Bullgaria, vendi më i prekur në BE
Bullgaria ka qenë një nga vendet më të goditura nga zjarret në pyje në vitet e fundit. Rreth 40.000 hektarë janë djegur vetëm në dy vitet e fundit, ndërsa 15 mijë hektarë janë shkatërruar vetëm këtë vit.
Sipas Ministrisë së Brendshme, shkaktarët kryesorë janë pakujdesia dhe veprimet kriminale. Dy persona janë arrestuar deri tani, të dy të dyshuar për ndezje të qëllimshme./Marrë nga DW