Përballjet mes Dinamos dhe Vllaznisë kanë qenë gjithmonë ndër më të veçantat e futbollit shqiptar, duke prodhuar emocione dhe rivalitet të fortë. Që prej vitit 1998, dy skuadrat janë ndeshur 66 herë në kampionat dhe statistikat tregojnë qartë një epërsi të shkodranëve ndaj “bluve” të kryeqytetit.
EPËRSIA E VLLAZNISË – Nga 66 sfida të zhvilluara, Vllaznia ka fituar 29 takime, ndërsa Dinamo ka arritur të triumfojë 21 herë. Në 16 raste të tjera, duelet janë mbyllur pa fitues. Shifrat dëshmojnë një dominim relativ të kuqebluve, të cilët jo vetëm kanë marrë më shumë fitore, por edhe kanë grumbulluar më shumë pikë: 103 kundrejt 79 të Dinamos.
SOLIDË NË TRANSFERTË – Në Shkodër, Vllaznia ka qenë pothuajse e pathyeshme, me 18 fitore, 5 barazime dhe 11 humbje. Golat gjithashtu flasin për forcën e tyre në shtëpi, 53 të shënuar dhe 41 të pësuar. Edhe në transfertë, shkodranët kanë ditur të tregojnë karakter, duke marrë 11 fitore dhe duke barazuar 11 herë, me vetëm 10 humbje, një bilanc që tregon për vazhdimësi dhe ekuilibër. DINAMO- Bluve të kryeqytetit u ka munguar stabiliteti. Në shtëpi, Dinamo ka marrë 10 fitore, 11 barazime dhe 11 humbje, ndërsa në transfertë ka regjistruar 11 fitore, por edhe 18 humbje, me një golavarazh negativ që thekson diferencën mes dy ekipeve.
GOLAT DHE DIFERENCA – Në total, Vllaznia ka shënuar 85 gola kundrejt 72 të Dinamos, duke ruajtur një diferencë pozitive prej +13 golash. Në aspektin e pikëve, avantazhi është edhe më i dukshëm, 24 pikë më shumë për kuqeblutë në bilancin historik të ndeshjeve direkte. Nga 1998 e deri më sot, Vllaznia ka treguar se është një kundërshtar më i fortë dhe më konstant në duelet ndaj Dinamos. Shkodranët kanë ditur të marrin rezultate pozitive si në “Loro Boriçi”, ashtu edhe në kryeqytet, duke ndërtuar një bilanc që i favorizon qartësisht. Dinamo ka arritur fitore të rëndësishme në disa raste, por në total historia e ka ngjyrosur kuqeblu këtë rivalitet.
SEZONI FUNDIT – Duelet mes Dinamos dhe Vllaznisë kanë qenë ndër më interesantet e sezonit të shkuar në Superiore. Me të dy ekipet që rivalizuan deri në fund për titullin kampion, madje edhe duke u ndeshur në gjysmëfinalet e “final 4”, ku triumfues dolën shkodranët me rezultatin 2-1. Por, përballjet e sezonit të kaluar mes dy ekipeve kanë qenë plot 7 të tilla, duke qenë dy skuadrat që janë ndeshur më shumë mes tyre në kampionat, kupë dhe “Final 4”.
Shifrat e edicionit të kaluar tregojnë pak a shumë për një balancë mes dy skuadrave, pavarësisht se ndoshta Dinamo fillimisht u cilësua si “macja e zezë” për kuqeblutë. Kështu në ndeshjen e fazës së parë të Superiores 2024-25, do të ishte Dinamo që do fitonte me përmbysje në shifrat 2-1. Kryeqytetasit do ‘triumfonin’ edhe në Shkodër në fazën e dytë falë fitores 2-3, me një prej ndeshjeve më të bukura të sezonit të shkuar.
Në fazën e tretë gjithçka do të ndahej në “paqe” mes dy skuadrave në rezultatin 0-0. E teksa Vllaznia do kishte vetëm 1 fitore gjatë sezonit të rregullt me shifrat 3-0 në ndeshjen e fazës së katërt. Në gjysmëfinalet e kupës rezultatet mes dy ekipeve do ishin 0-0 në Shkodër dhe 4-3 në Elbasan në favor të Dinamos. Rezultat që do i siguronte ekipit të Dajës finalen e Kupës, të cilën më pas do e fitonin ndaj Egnatias. Dueli i fundit mes dy skuadrave është në datën 04.05.2025, ku në duelet e “Final 4”, Vllaznia fitonte 2-1 ndaj Dinamos. Një total prej 7 ndeshjesh në edicionin e shkuar që flasin për 3 fitore të Dinamos, 2 barazime dhe 2 suksese të kuqebluve. Shifra që tregojnë një barazpeshë mes dy skuadrave që edhe kësaj rradhe pritet të prezantojnë një futboll për t’u shijuar nga tifozët.
