“Loro Boriçi” kthehet në fortesën e Vllaznisë, shkodranët nuk humbasin prej 6 muajve në stadiumin e vet

Vllaznia do të rikthehet sërish këtë fundjavë për të luajtur në kampionat dhe konkretisht ditën e shtunë në orën 19:00.

Ku kuqeblutë e drejtuar nga Edi Martini do të kenë përballë Partizanin, në një duel që konsiderohet mes dy pretendentëve të këtij edicioni. Shkodranët do t’i presin të kuqtë në shtëpinë e tyre, në stadiumin “Loro Boriçi”, ku përballë tifozëve vendas që pritet të jenë të shumtë në impiant, kërkojnë të mos zhgënjejnë dhe të marrin një rezultat pozitiv.

Dhe në fakt Vllaznia ka 6 muaj që nuk pëson një humbje në shtëpi, mes ndeshjeve të kampionatit të shkuar, atij aktual, kupës dhe “Conference League”. Kështu humbja e fundit në “Loro Boriçi” për Vllazninë shënohet në datën 15.3.2025, ku kuqeblutë në kuadër të javës së 30-të të edicionit 2024-25 u mposhtën në shtëpi nga Skënderbeu. Me korçarët që fituan 1-2 në Shkodër falë një dopiete të Nasr, që zhvlerësoi golin e barazimit të përkohshëm të shkodranëve me anë të Qatos.

Që nga ai moment, 9 herë kampionët e vendit nuk kanë pësuar asnjë humbje në “Loro Boriçi”, duke e shndërruar stadiumin në një “fortesë”. Kështu në takimet pasardhëse në sezonin e shkuar Vllaznia në shtëpi ka barazuar 0-0 ndaj Teutës, ka fituar ndaj Dinamos në shifrat 3-0 dhe po ashtu ka barazuar ndaj Laçit 1-1. Teksa ka pasur edhe një barazim 0-0 kundër Dinamos në kuadër të ndeshjes së parë gjysmëfinale të kupës së edicionit 2024-25. Tradita pozitive ka vijuar edhe këtë edicion në ndeshjet e zhvilluara në “Loro Boriçi”, me Vllazninë që mposhti Egnatian 2-0 në javën e parë të sezonit 2025-26. Po ashtu në Europë ka ardhur edhe fitorja 2-1 ndaj Vikingurit në ndeshjen e parë të turit të dytë të “Conference League”.

Pavarësisht se shkodranët kanë pësuar një humbje si pritës këtë sezon, ku janë mposhtur 0-1 ndaj Daugavpils në ndeshjen e parë të turit të parë të “Conference League”, dueli nuk është zhvilluar në “Loro Boriçi”, por në stadiumin “Elbasan Arena”, ku kuqeblutë morën këtë disfatë. Teksa në stadiumin dhe qytetin e tyre, Vllaznia nuk njeh humbje prej 6 muajsh, statistika që patjetër do të kërkojë t’i pasurojë edhe në ndeshjet e tjera, duke nisur nga kjo e radhës kundër Partizanit ditën e shtunë.