Egnatia zbret në fushë ndaj Bylisit në një moment delikat të sezonit. Katër ndeshje pa fitore, dy prej të cilave në kampionat, kanë krijuar një atmosferë të rënduar në Rrogozhinë, ku presioni mbi skuadrën është rritur ndjeshëm. Në qendër të kësaj situate qëndron trajneri Edlir Tetova, i cili është i detyruar të gjejë rrugën e fitores për të rikthyer qetësinë dhe besimin.
Kjo përballje nuk është thjesht një ndeshje kampionati: është një test karakteri dhe personaliteti, ku trajneri duhet të tregojë se di të menaxhojë presionin dhe të nxjerrë më të mirën nga grupi i tij. Në Rrogozhinë mendojnë se kjo është një nga ato ndeshje që Tetova duhet të bëjë “kampionin”. Ai e ka treguar dy vitet e fundit që mund të mbajë skuadrën në shinat e suksesit dhe tashmë i duhet të përsërisë të njëjtën gjë. Një fitore ndaj Bylisit do të kishte vlerë të shumëfishtë: do të shënonte fundin e serisë negative, do të qetësonte ambientin dhe do ta mbante Egnatian në garën për objektivat madhorë të sezonit.
STATISTIKAT E TETOVËS – Nëse ka një gjë që e mban lart moralin e Tetovës dhe Egnatias para këtij dueli, janë statistikat. Në 9 ndeshje të drejtuara ndaj Bylisit, ai numëron 7 fitore dhe 2 barazime, duke mos njohur asnjë humbje. Ky bilanc i shkëlqyer e vendos trajnerin e Egnatias në një pozicion të favorshëm psikologjikisht. Kundërshtari duket sikur i shkon “për dore”, dhe ky fakt e bën Tetovën të shihet si një lloj “hajmalie” për Egnatian kur përballet me ballshiotët. Kjo është një kartë e fortë që trajneri duhet ta shfrytëzojë për t’i dhënë fund krizës së skuadrës së tij.
DUELI ME JOSËN – Në krahun tjetër të pankinës do të jetë një emër i madh i futbollit shqiptar, Mirel Josa. Përplasja mes dy trajnerëve ka gjithmonë interes të veçantë. Deri tani, në 5 duele mes tyre, Tetova ka dalë fitues 3 herë, ndërsa dy ndeshje janë mbyllur në barazim. Balanca anon sërish në favor të Tetovës, që ka treguar se di ta lexojë lojën edhe përballë një tekniku me përvojë të gjatë dhe me shumë trofe në karrierën e tij. Ky duel shton vlerën e sfidës, pasi nuk është thjesht një betejë mes dy skuadrave, por edhe një dyluftim i drejtpërdrejtë mes dy filozofive të ndryshme drejtimi.
