Aktori i njohur John Malkovich ka pranuar publikisht, pas gati katër dekadash, se ndjen ende keqardhje për romancën e shkurtër me aktoren Michelle Pfeiffer gjatë xhirimeve të filmit “Dangerous Liaisons” në vitin 1988. Në atë kohë, të dy ishin të martuar, Malkovich me aktoren Glenne Headly dhe Pfeiffer me aktorin Peter Horton dhe lidhja e tyre e shkurtër në prapaskenë ndikoi drejtpërdrejt në marrëdhëniet e tyre familjare, edhe pse romanca nuk zgjati.
Në një intervistë për ‘podcast’-in “Fashion Neurosis”, 71-vjeçari tha se kjo periudhë ka qenë një nga përvojat që e kanë ndjekur gjatë gjithë jetës. Ai pranoi se duke hyrë në një marrëdhënie intime me Pfeiffer, kishte “sabotuar” raportin profesional me të, ndonëse e vlerësonte shumë si kolege për ndershmërinë, humorin dhe talentin e saj.
Malkovich theksoi se me kalimin e viteve ka kuptuar diçka thelbësore: një koleg i shkëlqyer është shumë më i rrallë dhe më i çmuar sesa një lidhje e përkohshme. Ai përmendi si shembull marrëdhënien e tij të gjatë me aktoren Ingeborga Dapkunaite, me të cilën ka bashkëpunuar për më shumë se 30 vjet. Sipas tij, fakti që ata kanë ruajtur gjithmonë kufijtë profesionalë u ka mundësuar të mbeten ende miq dhe bashkëpunëtorë të afërt.
Historia e Malkovich dhe Pfeiffer shërben si një kujtesë se marrëdhëniet profesionale të qëndrueshme dhe respekti në skenë mund të jenë më të rëndësishme dhe më të qëndrueshme se romancat e përkohshme.
