Barcelona nuk gjen qetësi, me ekipin blaugrana që “zien” më shumë se kurrë. Pas lajmit të bujshëm i bërë publik vetëm një ditë më parë, me mediat që flasin për një largim të Flick në fund të këtij sezoni, ekipi i tij ndalet në një barazim të papritur 3-3 përballë Club Brugge, madje ishin dhe me fat që dalën me një pikë. Tifozët e Barçës përjetuan makthet e sezonit të shkuar, ku një mbrojtje horror futi ujë në çdo anë.
Belgët i befasuan që në start duke kaluar në avantazh pas vetëm 6 minutash lojë. Barça reagoi menjëherë dhe dy minuta më vonë, Ferran Torres rikthehu baraspeshën, i shërbyer pastër nga Fermin Lopez. Forbs u kthye në protagonistin absolut të këtij takimi, me sulmuesin portugez që në minutën e 17-të nuk shërbeu, por finalizoi vetë duke rikthyer sërish Brugge në avantazh.
Dy ekipet zhvilluan një futboll të hapur ofensivë, ndërsa në fraksionin e dytë stafetën e mori Lamine Yamal. Talenti spanjoll realizoi një gol shumë të bukur në minutën e 61-të duke barazuar shifrat në 2-2. Është e pabesueshme, por sërish, pas vetëm dy minutash, Forbs “dogji” mbrojtjen e Barçës duke realizuar golin e dytë personal dhe të tretin për Club Brugge.
Për të rikthyer edhe një herë ekipin e Flick në lojë mendoi Lamine Yamal, ku topi i futur në zonë prej tij gjeti një devijim duke përfunduar në rrjetë. As këtë herë Yamal nuk festoi. Barça përjetoi makthe deri në fund, pasi në shtesë, Brugge gjeti dhe golin e katërt, për fatin e tyre, VAR anuloi gjithçka për faull ndaj Sheznit. Pas këtij hapi fals, Barça e sheh veten në vendin e 11-të në Champions në kuotën e 7 pikëve.
Në konferencë për shtyp, Hansi Flick u ndal fillimisht te problemet që ekipi shfaqi në mbrojtje: “Sezonin e shkuar nuk do ta kishim pësuar atë gol të parë. Nuk kemi të njëjtin vetëbesim kur përdorin kurthin e ofsajdit, por nuk kemi ndërmend të ndryshojmë mënyrën tonë të mbrojtjes. Duhet të analizojmë këtë barazim dhe të shohim se ku mund të përmirësohemi. Nuk jemi në formën tonë më të mirë, por duhet të qëndrojmë pozitiv. Do të arrijmë të rikthemi në nivelin tonë më të mirë pasi të na rikthen lojtarë si Raphinha, Pedri dhe Joan Garcia”, u shpreh Hansi Flick.
()
